Pune Crime : ‘निर्दोष मुक्त करा’, दत्ता गाडेचा अर्ज; घटनास्थळी सापडले केस व शर्टाचं बटण, स्वारगेट अत्याचार प्रकरणात वर्षभरात नेमकं काय घडलं?

Pune : पुण्यासह राज्यभरात खळबळ उडवून दिलेल्या स्वारगेट बलात्कार प्रकरणाला वर्ष उलटले, तरी आरोपीविरोधात न्यायालयात आरोप निश्चिती झालेली नाही. आरोपी दत्तात्रय गाडे याने जामीन मिळण्यासाठी मुंबई उच्च न्यायालयात धाव घेतली असून, पुणे सत्र न्यायालयात निर्दोष मुक्ततेचा अर्ज केला आहे. या अर्जांवर न्यायालयाने आदेश दिल्यानंतरच आरोप निश्चिती होऊन खटल्याच्या सुनावणीचा मार्ग मोकळा होणार आहे. परिणामी पीडिता अद्याप न्यायाच्या प्रतीक्षेतच आहे.

काय आहे प्रकरण?
स्वारगेट आगारात शिवशाही बसमध्ये आरोपी दत्तात्रय रामदास गाडे (वय ३७, रा. गुनाट, शिरूर) याने तरुणीवर दोन वेळा बलात्कार केल्याची घटना २५ फेब्रुवारी २०२५ रोजी पहाटे पावणेसहा ते पावणेसातच्या दरम्यान घडली होती. त्यानंतर गाडे आपल्या गावातील शेतात लपून बसला होता. पुणे पोलिसांनी त्याला जेरबंद करून प्रथमवर्ग न्यायदंडाधिकारी न्यायालयात हजर केले होते. न्यायालयाने त्याला १२ दिवसांची पोलिस कोठडी सुनावली होती. त्यानंतर त्याची रवानगी येरवडा कारागृहात न्यायालयीन कोठडीत करण्यात आली.

आरोपपत्र आणि साक्षीदारांचे जबाब
तपास अधिकारी शैलेश संखे यांच्या पथकाने आरोपी गाडेविरोधात पुरावे गोळा केले. गुन्हा घडल्यानंतर ५२ दिवसांच्या आत पोलिसांनी गाडेविरोधात ८९२ पानांचे आरोपपत्र न्यायालयात दाखल केले. त्यात ८२ साक्षीदारांकडे तपास करून पाच साक्षीदारांचे जबाब न्यायालयात नोंदविले आहेत. एकूण १२ पंचनामे करण्यात आले असून, गुगल सर्च हिस्टरी, तुलनात्मक ध्वनी तीव्रता पडताळणी, ओळख परेड, सीसीटीव्ही आणि निवेदन या पाच महत्त्वाच्या पंचनाम्यांतून गाडे गुन्ह्याच्या वेळी घटनास्थळी हजर असल्याचे थेट व परिस्थितीजन्य पुरावे आरोपपत्रात आहेत. या खटल्यात सरकार पक्षातर्फे विशेष सरकारी वकील अजय मिसार काम पाहत आहेत, तर पीडितेच्या वतीने ॲड. श्रीया आवले बाजू मांडत आहेत.

आरोपी गाडेने जामीन मिळण्यासाठी केलेले दोन्ही अर्ज पुणे न्यायालयाने फेटाळले आहेत. त्यामुळे गाडेने ॲड. वाजेद खान बीडकर यांच्यामार्फत जामीन मिळण्यासाठी उच्च न्यायालयात अर्ज केला आहे; तसेच या गुन्ह्यातून निर्दोष मुक्ततेसाठी पुणे सत्र न्यायालयात अर्ज केला आहे. त्याला पुणे पोलिस, सरकारी वकील आणि पीडितेच्या वकिलांनी विरोध केला आहे. ‘आरोपीच्या अर्जावर उच्च न्यायालय आणि सत्र न्यायालयाच्या आदेशानंतर या खटल्यात आरोप निश्चिती होईल. त्यानंतर आरोपीविरोधात खटल्याची सुनावणी सुरू होईल,’ असे विशेष सरकारी वकील अजय मिसार यांनी ‘मटा’शी बोलताना सांगितले.

तपासातील ठळक मुद्दे
- घटनास्थळावर केस व शर्टाचे बटण सापडले असून, रासायनिक प्रयोगशाळेच्या तपासणीत ते आरोपी दत्तात्रय गाडे याचेच असल्याचे निष्पन्न झाले.
- आरोपी गाडे गुन्ह्याच्या दिवशी स्वारगेट बसस्थानकात पहाटेपासून होता; तसेच तो पीडितेशी बोलत होता, असे पाच प्रत्यक्षदर्शी साक्षीदारांनी पाहिले असून, त्यांचे जबाब न्यायालयात नोंदवण्यात आले आहेत.
- आरोपी गाडे लैंगिकदृष्ट्या सक्षम असल्याचा अहवाल ससून रुग्णालयाच्या तीन तज्ज्ञ डॉक्टरांनी दिला.
- पीडितेने या अत्याचाराबाबत राज्य परिवहन महामंडळाच्या चालक-वाहकांना माहिती देऊन आरोपी गाडेचा शोध घेण्याची विनंती केली होती. या चालक-वाहकांना शोधून पोलिसांनी त्यांचे जबाब न्यायालयात नोंदवले आहेत.
- स्वारगेट एसटी स्थानकातील सीसीटीव्ही चित्रीकरणात आरोपी गाडे घटनास्थळी हजर असल्याचे प्रयोगशाळेच्या अहवालात नमूद आहे.
- आरोपीच्या मोबाइल क्रमांकावरून सायबर तज्ज्ञांनी त्याची 'गुगल सर्च हिस्टरी' तपासली. त्यात आरोपी गाडे अश्लील व्हिडिओ पाहत असल्याचे आढळले. त्यामुळे 'गुगल सर्च हिस्टरी'चा पंचनामा करण्यात आला.
- ओळख परेडमध्ये पीडित तरुणीने आरोपी गाडेला ओळखले आहे.