Pune : पुण्यात धक्कादायक प्रकार; PMP बसमध्ये कंडक्टरकडून अल्पवयीन मुलीशी गैरवर्तन, प्रवाशांमध्ये संताप

Pune : शहरातील दैनंदिन प्रवासासाठी नागरिकांचा विश्वास असलेल्या पीएमपी बस सेवेवरच आता सुरक्षेबाबत गंभीर प्रश्नचिन्ह उपस्थित झाले आहे. विशेषतः अल्पवयीन मुलींच्या सुरक्षिततेच्या दृष्टीने दोन अलीकडील घटनांनी नागरिकांमध्ये संताप आणि चिंता निर्माण केली आहे.

पहिली घटना कात्रज ते स्वारगेट मार्गावरील बसमध्ये घडली. या बसमध्ये प्रवास करणाऱ्या एका अल्पवयीन मुलीशी बसच्या वाहकाने गैरवर्तन केल्याचा आरोप करण्यात आला आहे. सहकारनगर पोलिसांनी या प्रकरणी आरोपीला अटक केली आहे.

माहितीनुसार, प्रवासादरम्यान वाहकाने मुलीशी संवाद साधण्याचा प्रयत्न करत तिच्याकडे मोबाईल नंबरची मागणी केली. मुलीने स्पष्ट नकार दिल्यानंतरही त्याने आपले वर्तन न बदलता तिला अयोग्य स्पर्श केल्याचा आरोप आहे.

या प्रकारामुळे घाबरलेल्या मुलीने मोठ्याने आरडाओरडा केला. तिचा आवाज ऐकून बसमधील प्रवाशांनी तत्काळ हस्तक्षेप केला. परिस्थितीची गंभीरता ओळखून त्यांनी बस थांबवून आरोपीला पकडले. मुलीकडून माहिती घेतल्यानंतर संपूर्ण घटना स्पष्ट झाली आणि संतप्त प्रवाशांनी आरोपीला पोलिसांच्या ताब्यात दिले.

या प्रकरणी मुलीच्या आईने तक्रार दाखल केली असून, आरोपीवर पोक्सो कायद्यांतर्गत गुन्हा नोंदवण्यात आला आहे. पुढील तपास सुरू आहे.