पुणे: पुणे हादरले! पतीशी अनैतिक संबंधाचा संशय, वकिलाच्या पत्नीने सेक्रेटरीचा अत्यंत क्रूरपणे घेतला जीव; तोंडावर कोयत्याने ५६ वार

पुणे: पुण्यातील चंदननगर परिसरात एका वकिलाच्या पत्नीने आपल्या पतीच्या कार्यालयात काम करणाऱ्या महिलेचा अत्यंत निर्घृणपणे खून केल्याची धक्कादायक घटना समोर आली आहे. पतीसोबत असलेल्या अनैतिक संबंधाच्या संशयावरून हे हत्याकांड घडले असून, आरोपीने मृतदेहाची विल्हेवाट लावण्याचा प्रयत्न केला, मात्र वजन जास्त असल्यामुळे तो प्रयत्न फसला.

नेमकी घटना काय?
पुनम दिनेश मून (वय ३५, रा. येरवडा) असे मृत महिलेचे नाव आहे. पुनम गेल्या साडेतीन वर्षांपासून ॲड. संजय सावंत यांच्या कार्यालयात साहाय्यक म्हणून काम करत होत्या. ॲड. सावंत यांची पत्नी स्वाती सावंत (वय ४३) हिला या दोघांमध्ये अनैतिक संबंध असल्याचा संशय होता. या रागातून स्वातीने आपल्या अल्पवयीन मुलीसह गुरुवारी (१६ एप्रिल) पतीच्या कार्यालयात जाऊन पुनम यांच्याशी वाद घातला.

अत्यंत क्रूर हत्या:
वादाचे रूपांतर हाणामारीत झाले. स्वातीने आधी पुनम यांच्या डोळ्यांत झुरळ मारण्याचे औषध फवारले, जेणेकरून त्यांना काही दिसणार नाही. त्यानंतर तिने लाकडी बॅटने त्यांच्या डोक्यात प्रहार केला. इतक्यावरच न थांबता, स्वातीने कार्यालयातील कोयत्याने पुनम यांच्या चेहऱ्यावर आणि तोंडावर एकापाठोपाठ ५६ वार केले, ज्यात त्यांचा जागीच मृत्यू झाला.

विल्हेवाट लावण्याचा प्रयत्न फसला:
खून केल्यानंतर पुरावा नष्ट करण्यासाठी स्वातीने दोन प्लास्टिकची पोती आणली. तिने मृतदेह पोत्यात भरून बाहेर नेण्याचा प्रयत्न केला, मात्र मृतदेहाच्या वजनामुळे तिला ते शक्य झाले नाही. अखेर आरोपी मृतदेह कार्यालयातच सोडून फरार झाले. तपासादरम्यान पोलिसांनी अॅड. संजय सावंत आणि स्वाती सावंत या पती-पत्नीला अटक केली आहे, तर त्यांच्या अल्पवयीन मुलीला ताब्यात घेतले आहे.