Pune : पुण्यात ऑफिससाठी निघालेल्या तरुण इंजिनिअरचा मार्गातच अंत; भरधाव टँकरची धडक, भीषण अपघातात मृत्यू

Pune : सकाळची नेहमीची धावपळ, ऑफिसला पोहोचण्याची घाई आणि काही क्षणांतच आयुष्य संपलं… पुण्यातील वानवडी परिसरात भरधाव पाण्याच्या टँकरने एका तरुण इंजिनिअरचा बळी घेतल्याने शहर हादरलं आहे.

ग्रेसिया डॅनियल इसा (वय २४, रा. केदारीनगर) असे मृत तरुणीचे नाव आहे. मंगळवारी सकाळी साडेसातच्या सुमारास गंगा सॅटेलाइट परिसरातील नाल्यावरील पुलाजवळ हा भीषण अपघात घडला. ग्रेसिया खाजगी कंपनीत इंजिनिअर म्हणून कार्यरत होती. त्या दिवशी कामानिमित्त तिला लवकर ऑफिसला जायचे होते.

दुचाकीवरून जात असताना वळणावर भरधाव येणाऱ्या पाण्याच्या टँकरने तिच्या वाहनाला जोरदार धडक दिली. धडकेनंतर ती रस्त्यावर कोसळली आणि टँकरच्या चाकाखाली आल्याने तिच्या डोक्याला गंभीर दुखापत झाली. घटनास्थळी उपस्थित नागरिकांनी तत्काळ मदत करत तिला रुग्णालयात हलवण्याचा प्रयत्न केला, मात्र डॉक्टरांनी उपचारांपूर्वीच तिला मृत घोषित केले.

या प्रकरणी टँकर चालक संतोषकुमार मोर्या (वय ४५) याने अपघातानंतर स्वतःहून पोलिस ठाण्यात जाऊन शरणागती पत्करली. पोलिसांनी त्याला ताब्यात घेतले असून वानवडी पोलिस ठाण्यात गुन्हा दाखल करण्यात आला आहे. पुढील तपास सुरू आहे.

दरम्यान, गेल्या ४८ तासांत टँकरच्या धडकेत मृत्यूची ही दुसरी घटना ठरल्याने नागरिकांमध्ये संताप व्यक्त होत आहे. शहरात वाढलेल्या टँकर वाहतुकीमुळे रस्ते अधिक धोकादायक बनत असल्याची तक्रार स्थानिकांकडून करण्यात येत आहे. विशेषतः वळणांवर वेगावर नियंत्रण नसणे आणि वाहतुकीच्या नियमांचे उल्लंघन ही अपघातामागची प्रमुख कारणे असल्याचे बोलले जात आहे.

“अशा घटना वारंवार घडत आहेत. टँकर वाहतुकीवर नियंत्रण आणणे अत्यंत गरजेचे आहे,” अशी प्रतिक्रिया नागरिकांकडून उमटत आहे. प्रशासनाने याकडे गांभीर्याने लक्ष देत कठोर उपाययोजना कराव्यात, अशी मागणीही जोर धरत आहे.

या घटनेमुळे पुन्हा एकदा पुण्यातील रस्ते सुरक्षेचा प्रश्न ऐरणीवर आला आहे. घरातून बाहेर पडलेला व्यक्ती सुरक्षितपणे परत येईल का, अशी भीती पुणेकरांच्या मनात निर्माण झाली आहे.