Pune : गणेशोत्सवाला कोकणात जाणाऱ्यांसाठी Good News! पुण्याहून आणखी ६ स्पेशल ट्रेनचं नियोजन, बुकिंग कधीपासून?

Pune : मध्य रेल्वेकडून कोकणात जाणाऱ्या गणेशभक्तांच्या सोयीसाठी ‘२२२ गणपती विशेष रेल्वे’ चालवण्याचा निर्णय घेण्यात आला आहे. त्यामध्ये पुणे-रत्नागिरी साप्ताहिक विशेष गाडीच्या सहा फेऱ्या होणार आहेत. या गाड्यांचे बुकिंग नुकतेच (सात ऑगस्ट) सुरू झाले आहे.

कोकणात गणेशोत्सव मोठ्या प्रमाणात साजरा केला जातो. त्यामुळे कोकणात गणेशोत्सवाला जाणाऱ्यांची संख्या मोठी असते. त्यामुळे रेल्वेकडून प्रत्येक वर्षी या काळात कोकणात विशेष गाड्या सोडण्यात येतात. तिकिटांचे बुकिंग सुरु होताच, काही तासांतच तिकिटं हाऊसफुल्ल होतात. ही परिस्थिती लक्षात घेता रेल्वे विभागाकडून या विशेष गाड्या सोडण्यात येत आहे. पुण्यातदेखील नोकरी, व्यवसाय आणि शिक्षणाच्या निमित्ताने राहणाऱ्यांची संख्या मोठी आहे. त्यामुळे पुण्यात राहणाऱ्या कोकणातील व्यक्तींसाठी पुणे रेल्वेने विशेष गाड्या चालवण्याचा निर्णय घेतला आहे.

Pune : शहरातील खड्डे दुरुस्ती जीवघेणी; बुजविलेल्या खड्ड्यांमधील खडी रस्त्यांवर पसरल्याने अपघातांचा धोका

या गाड्यांना चिंचवड, तळेगाव, लोणावळा, कल्याण, पनवेल, पेण, रोहा, माणगाव, वीर, करंजाडी, खेड, चिपळूण, सावर्डा, आरवली रोड आणि संगमेश्वर रोड असे थांबे असणार आहेत. या गाड्यांचे बुकिंग नुकतेच (सात ऑगस्ट) सुरू झाले आहे. जर तुम्हीही कोकणात गणेशोत्सवाला जाणार असाल तर आजच आपलं तिकिट बुक करा.
पुण्यातून सुटणाऱ्या गाड्यांची माहिती

- गाडी क्रमांक ०१४४७ विशेष गाडी पुणे येथून सात आणि १४ सप्टेंबर रोजी मध्यरात्री १२.२५ वाजता सुटेल. रत्नागिरी येथे ती त्याच दिवशी सकाळी ११.५० वाजता पोहोचेल.

- गाडी क्रमांक ०१४४८ विशेष गाडी रत्नागिरी येथून आठ आणि १५ सप्टेंबर रोजी सायंकाळी ५.५० वाजता सुटेल. ती पुण्यात दुसऱ्या दिवशी पहाटे पाच वाजता पोहोचेल.
- गाडी क्रमांक ०१४४५ ही पुणे-रत्नागिरी गाडी १० सप्टेंबर रोजी पुण्यातून मध्यरात्री १२.२५ वाजता सुटेल. ती त्याच दिवशी सकाळी ११.५० वाजता रत्नागिरी येथे पोहोचेल.

- गाडी क्रमांक ०१४४६ ही विशेष गाडी रत्नागिरी येथून ११ सप्टेंबर रोजी सायंकाळी ५.५० वाजता सुटेल. ती पुणे येथे दुसऱ्या दिवशी सायंकाळी पाच वाजता दाखल होईल.