Nashik : प्रजासत्ताक दिनी गोंधळ! वन कर्मचाऱ्याचा मंत्री महाजनांना सवाल, ‘बाबासाहेबांचं नाव का घेतलं नाही?’

Nashik : नाशिकमध्ये प्रजासत्ताक दिनाचा पोलिस परेड ग्राउंड येथे सुरू असलेल्या मुख्य शासकीय सोहळ्या दरम्यान एक खळबळजनक घटना घडली. ध्वजारोहण सोहळ्या प्रसंगी राज्याचे ग्रामविकास मंत्री गिरीश महाजन यांचे भाषण सुरू असताना एकच गोंधळ झाला. वनविभागाच्या एका महिला कर्मचाऱ्याने 'डॉ. बाबासाहेब आंबेडकरांचे नाव का घेतले नाही?' अशा शब्दांत मंत्री गिरीश महाजन यांना जाब विचारला. त्यामुळे गोंधळाचे वातावरण निर्माण झाले. या प्रकारामुळे काही काळ सोहळ्यात व्यत्यय आला होता. यावेळी उपस्थित असलेल्या पोलिसांनी तातडीने संबंधित महिलेला ताब्यात घेतले. माधुरी जाधव असे या महिलेचे नाव आहे.

पोलीस परेड मैदानावर प्रजासत्ताक दिनाचा कार्यक्रम झाल्यानंतर मंत्री गिरीश महाजन हे उपस्थितांना संबोधित करत होते. यावेळी त्यांनी भाषणात भारतीय संविधानाचे शिल्पकार भारतरत्न डॉ. बाबासाहेब आंबेडकर यांचे नाव घ्यायचे राहून गेल्याचा आरोप या महिला कर्मचाऱ्याने केला. भर कार्यक्रमात ही महिला आपल्या जागेवरून उठून थेट मैदानाकडे धावली आणि आरडाओरडा करत निषेध नोंदवू लागली होती.त्यामुळे काहीकाळ एकाच गोंधळ उडाला होता.

Republic Day 2026 : ध्वजारोहण सुरू असतानाच धक्कादायक घटना; पोलीस कर्मचारी अचानक कोसळला आणि क्षणातच मृत्यू, धाराशिवमधील VIDEO समोर

अचानक घडलेल्या या प्रकारामुळे प्रशासन आणि पोलीसांची तारांबळ उडाली होती. मात्र, प्रसंगावधान राखून तेथे तैनात असलेल्या महिला पोलीस कर्मचाऱ्यांनी संबंधित महाराष्ट्र शासन वन विभागाच्या महिला कर्मचाऱ्याला रोखत तिला तातडीने ताब्यात घेण्यात आले. एका जबाबदार पदावर कार्यरत असलेल्या महिला कर्मचाऱ्याने अशा प्रकारे शिष्टाचाराचा भंग केल्याने आश्चर्य केले जात आहे. या घटनेचे प्रसाद प्रशासकीय वर्तुळात उमटण्याची शक्यता असून संबंधित महिला अधिकाऱ्यावर शिस्तभंगाची कार्यवाही केली जाते याकडे सर्वांचे लक्ष लागून आहे.

मी मातीकाम करेन. मला निलंबित करायचे तर करा. पण बाळासाहेबांना संपवायचे काम करायचे नाही. पालकमंत्री संविधानामुळे आहेत. कोणताही जातीभेद नाही. सर्व समानता घटनेमुळे आहे. प्रजासत्ताक दिनाचे मानकरी असलेल्या बाबासाहेब आंबेडकर यांचे नाव का घेतले जात नाही, असा सवाल करत महिला कर्मचाऱ्याने तीव्र संताप व्यक्त केला. या महिलेचा व्हिडीओ सोशल मीडियावर व्हायरल झाला आहे.