Mumbai :वडिलांच्या निधनाने ‘दयाबेन’ दिशा वकानीवर दु:खाचा डोंगर; भाऊ मयूरही खचला

 

 

Mumbai :‘तारक मेहता का उल्टा चष्मा’ या लोकप्रिय मालिकेत दयाबेनची भूमिका साकारून घराघरात पोहोचलेली अभिनेत्री दिशा वकानी हिच्या वडिलांचे निधन झाले आहे. तिचे वडील भीम वकानी यांनी मंगळवारी (7 एप्रिल) सकाळी सुमारे 8.30 वाजता अखेरचा श्वास घेतला. ते 84 वर्षांचे होते आणि गेल्या काही दिवसांपासून आजारी होते.

 

या घटनेमुळे वकानी कुटुंबावर शोककळा पसरली असून दिशा आणि तिचा भाऊ, अभिनेता मयूर वकानी यांच्यावर मोठा आघात झाला आहे. अंत्यविधीचे काही व्हिडिओ सोशल मीडियावर समोर आले असून त्यामध्ये कुटुंबीय एकमेकांना धीर देताना दिसतात. विशेषतः मयूर वकानी यांना वडिलांच्या निधनाचा मोठा धक्का बसल्याचे दिसून येते.

भीम वकानी हे गुजराती रंगभूमीवरील ज्येष्ठ कलाकार होते. त्यांनी हिंदी चित्रपटसृष्टीतही काम केले होते. लगान, स्वदेस आणि लज्जा यांसारख्या चित्रपटांमध्ये त्यांनी भूमिका साकारल्या होत्या. तसेच ‘तारक मेहता का उल्टा चष्मा’ या मालिकेतील एका विशेष भागातही ते झळकले होते.

दिशा वकानीला अभिनयाची प्रेरणा तिच्या वडिलांकडूनच मिळाली होती. बालकलाकार म्हणून तिने त्यांच्यासोबत रंगभूमीवर काम करण्यास सुरुवात केली होती. पुढे ‘तारक मेहता का उल्टा चष्मा’मधील दयाबेनच्या भूमिकेमुळे तिला प्रचंड लोकप्रियता मिळाली.

काही वर्षांपूर्वी प्रसूतीसाठी ब्रेक घेतल्यानंतर दिशा मालिकेत परतली नाही. सध्या ती तिच्या कौटुंबिक आयुष्यावर लक्ष केंद्रित करत आहे. तरीही मालिकेचे निर्माते असितकुमार मोदी यांच्याशी तिचे जिव्हाळ्याचे संबंध कायम आहेत. रक्षाबंधनच्या दिवशी ती त्यांना राखी बांधते, अशी माहिती समोर आली आहे.

या कठीण काळात वकानी कुटुंबीयांवर शोकसंतप्त वातावरण असून चाहत्यांकडून सहानुभूती व्यक्त केली जात आहे.