Pune : कात्रज–कोंढवा रस्ता रुंदीकरणाला मोठा दिलासा; दोन राष्ट्रीय महामार्गांना जोडणारा महत्त्वाचा मार्ग. प्रकल्पाचा पहिला टप्पा जूनपर्यंत पूर्ण होणार.

Pune : पुण्यातील गेल्या दशकभरापासून रखडलेल्या कात्रज–कोंढवा रस्ता रुंदीकरण प्रकल्पाला अखेर मोठा दिलासा मिळाला आहे. राज्य सरकारच्या उच्चस्तरीय समितीने या प्रकल्पाच्या अंतिम निवाडा प्रस्तावास मंजुरी दिल्याने पहिल्या टप्प्यात ५० मीटर रुंदीचा रस्ता विकसित करण्याचा मार्ग मोकळा झाला आहे.

शहरातील दोन राष्ट्रीय महामार्गांना जोडणारा आणि मोठ्या प्रमाणावर जड वाहतूक सहन करणारा हा महत्त्वाचा मार्ग भूसंपादनाच्या अडचणींमुळे दीर्घकाळ प्रलंबित होता. मात्र, पुणे महापालिका आणि जिल्हाधिकारी कार्यालयाच्या समन्वयातून तयार करण्यात आलेला भूसंपादन प्रस्ताव मंत्रालयातील उच्चस्तरीय समितीच्या बैठकीत मंजूर करण्यात आला. महसूल विभागाचे अतिरिक्त मुख्य सचिव मिलिंद म्हैसकर यांच्या अध्यक्षतेखाली झालेल्या बैठकीत हा निर्णय घेण्यात आला.

महापालिका आयुक्त नवलकिशोर राम आणि जिल्हाधिकारी जितेंद्र डुडी यांनी या रस्त्याच्या प्रगतीसाठी सातत्याने पाठपुरावा केला होता. मंजुरीनंतर आता सरकारची औपचारिक मान्यता मिळाल्यावर भूसंपादन प्रक्रिया पूर्ण करून प्रत्यक्ष काम सुरू करण्याचे नियोजन असल्याची माहिती महापालिका प्रशासनाने दिली आहे.

या प्रकल्पात सुमारे ३.५ किलोमीटर लांबीच्या रस्त्यासाठी १२९ मिळकतींमधील अंदाजे ५२,६३० चौरस मीटर क्षेत्र संपादित केले जाणार आहे. पहिल्या टप्प्यात ५० मीटर रुंदीचा मुख्य रस्ता, दोन्ही बाजूंना सेवा रस्ते, पावसाळी जलवाहिनी तसेच माऊलीनगर परिसरात ग्रेड सेपरेटरचा समावेश असेल.

दरम्यान, राजस चौक येथे भारतीय राष्ट्रीय महामार्ग प्राधिकरणामार्फत (NHAI) उभारल्या जाणाऱ्या उड्डाणपुलाच्या कामालाही या प्रकल्पामुळे गती मिळणार आहे. उड्डाणपुलाच्या उतारासाठी आवश्यक असलेल्या सुमारे ४०० मीटर सर्व्हिस रोडचे काम सुरू असून त्यातील काही भाग पूर्ण झाला आहे.

सध्या कात्रज–कोंढवा मार्गावर दररोज १५,००० हून अधिक वाहने धावतात. त्यात अवजड वाहनांचे प्रमाणही लक्षणीय आहे. पर्यायी मार्गांचा अभाव असल्याने बोपदेव घाट आणि दिवे घाटातून येणारी वाहतूकही याच मार्गावर येते, त्यामुळे मोठ्या प्रमाणावर वाहतूक कोंडी निर्माण होते.

हा प्रकल्प दोन टप्प्यांत राबविण्यात येणार असून पहिल्या टप्प्यात ५० मीटर रुंदीचा मार्ग जून २०२६ पर्यंत पूर्ण करण्याचे नियोजन आहे. अंतिम विकास आराखड्यात हा रस्ता ८४ मीटर रुंदीचा प्रस्तावित आहे.