रक्षक बनला भक्षक! कर्जत-गुंडगे रेल्वे पुलावर पोलिसाकडूनच महिलेची छेड; ग्रामस्थांच्या आंदोलनानंतर पोलिसावर गुन्हा दाखल!

कर्जत (जि. रायगड): रायगड जिल्ह्यातील कर्जत येथे पोलीस दलाला कलंक लावणारी एक संतापजनक घटना उघडकीस आली आहे. कर्जत-गुंडगे दरम्यानच्या रेल्वे पादचारी पुलावरून रात्रीच्या वेळी घराकडे जाणाऱ्या एका महिलेचा मद्यधुंद अवस्थेतील पोलीस कर्मचाऱ्याने त्याच्या सहकाऱ्यासह पाठलाग करत विनयभंग केला. याप्रकरणी उपविभागीय पोलीस अधिकाऱ्यांच्या (DySP) ताफ्यात कार्यरत असलेला पोलीस कर्मचारी प्रमोद मारोती पाटील आणि त्याचा साथीदार महेंद्र भगवान भंडारे यांच्या विरोधात कर्जत पोलीस ठाण्यात गुन्हा दाखल करण्यात आला आहे.

नक्की काय घडली घटना? मिळालेल्या माहितीनुसार, १३ सप्टेंबर २०२६ रोजी रात्री सुमारे ९:३० वाजेच्या सुमारास तक्रारदार महिला आणि तिची बहीण कर्जत बाजारपेठेतून गुंडगे येथील आपल्या घरी परत जात होत्या. जकात नाका येथील रेल्वे स्टेशनच्या पुलावरून जात असताना मद्यधुंद अवस्थेत असलेल्या पोलीस कर्मचारी प्रमोद पाटील आणि महेंद्र भंडारे या दोघांनी त्यांचा पाठलाग सुरू केला. "चल येते का चल" असे म्हणत अश्लील कमेंट्स करून त्यांनी महिलेची छेड काढली.

बहिणीने बनवला व्हिडिओ; मध्यरात्री पोलीस ठाण्यात राडा: हा गैरप्रकार घडत असताना तक्रारदार महिलेच्या बहिणीने प्रसंगावधान राखून आपल्या मोबाईल फोनमध्ये संपूर्ण घटनेचे चित्रीकरण (व्हिडिओ शूटिंग) केले आणि आपल्या दाजींना याची माहिती दिली. महिलेच्या पतीने तातडीने घटनास्थळी पोहोचून जाब विचारला असता, छेड काढणारा व्यक्ती पोलीस कर्मचारी असल्याचे उघड झाले.

घटनेची माहिती मिळताच संतप्त ग्रामस्थांनी कर्जत पोलीस ठाण्याकडे धाव घेतली. सुरुवातीला पोलीस प्रशासनाने गुन्हा दाखल करण्यास टाळाटाळ केल्याचा आरोप करत ग्रामस्थांनी मध्यरात्री पोलीस ठाण्यात ठिय्या आंदोलन सुरू केले. ग्रामस्थांचा प्रचंड दबाव आणि आंदोलनानंतर अखेर मध्यरात्री ३ वाजताच्या सुमारास दोषी पोलीस कर्मचारी प्रमोद पाटील व महेंद्र भंडारे यांच्याविरुद्ध भारतीय न्याय संहितेच्या (BNS) संबंधित कलमांनुसार गुन्हा दाखल करण्यात आला. पोलीस या प्रकरणाचा पुढील तपास करत आहेत.