कोलाडजवळ भीषण अपघात! २५० फूट खोल दरीत कोसळला ट्रेलर; ५ तासांच्या थरारक रेस्क्यू ऑपरेशननंतर चालकाला जीवदान!

कोलाड/रोहा: पुणे-कोलाड मार्गावरील पहूर फाटा ते वाळंजवाडी दरम्यान लोखंडी कॉइल्स घेऊन जाणाऱ्या एका ट्रेलरचा भीषण अपघात झाला आहे. चालकाचे वाहनावरील नियंत्रण सुटल्याने हा ट्रेलर थेट २५० फूट खोल दरीत कोसळला. या अपघातात चालक आणि क्लिनर दोघेही जखमी झाले असून ५ तासांच्या खडतर रेस्क्यू ऑपरेशननंतर चालकाला दरीतून सुखरूप बाहेर काढण्यात आले.

झाडाच्या आधाराने टळला मोठा अनर्थ: मिळालेल्या माहितीनुसार, विले भागाड एमआयडीसीतून अवजड लोखंडी कॉइल्स घेऊन जाणारा हा ट्रेलर उतारावर असताना चालकाचा ताबा सुटला. ट्रेलर थेट २५० फूट खाली कोसळला; मात्र दरीतील एका मोठ्या झाडाला जाऊन अडकल्याने तो आणखी ५०० फूट खोल दरीत जाण्यापासून वाचला. अपघातादरम्यान क्लिनर किरकोळ जखमी होऊन बाहेर पडला, मात्र चालक केबिनमध्येच अडकून पडला होता.

५ तासांचे थरारक रेस्क्यू ऑपरेशन: घटनेची माहिती मिळताच कोलाड पोलीस, एसव्हीआरएसएस (SVRSS) रेस्क्यू टीम आणि एरुणकर क्रेन सर्व्हिसच्या पथकाने घटनास्थळी धाव घेतली. दरीत अडकलेला ट्रेलर आणखी खाली घसरण्याची भीती असल्याने आधी क्रेनच्या साह्याने वाहनाला स्थिर करण्यात आले. त्यानंतर बचाव पथकाने अत्यंत खबरदारीने आणि नियोजनबद्ध पद्धतीने काम करत तब्बल ५ तासांच्या अथक प्रयत्नांनंतर केबिनमध्ये अडकलेल्या चालकाला बाहेर काढले. जखमींवर तात्काळ रुग्णालयात उपचार सुरू करण्यात आले आहेत.