राजुरीत उत्साहात स्वागत! यादवकालीन परंपरेनुसार महाराष्ट्राची कुलस्वामिनी श्री तुळजाभवानी देवीच्या मानाच्या लाकडी पलंगाचे जोरदार आगमन

आळेफाटा / राजुरी: महाराष्ट्राची कुलस्वामिनी आणिकोट्यवधी भाविकांचे श्रद्धास्थान असलेल्या श्री तुळजाभवानी देवीच्या मानाच्या लाकडी पलंगाचे यादवकालीन परंपरेनुसार आळेफाटा परिसरातील राजुरी (ता. जुन्नर) या ठिकाणी गुरुवारी सायंकाळी पाच वाजण्याच्या सुमारास अत्यंत उत्साहात व जल्लोषात आगमन झाले. या आगमनामुळे संपूर्ण राजुरी आणि जुन्नर परिसर भक्तिमय वातावरणात न्हाऊन निघाला असून, भाविकांमध्ये प्रचंड आनंदाचे व श्रद्धेचे वातावरण पाहायला मिळाले.

राजुरी येथील तिळवण तेली समाजातील कै. बाबुराव व आप्पा रामभाऊ शिंदे (मेहतर) या प्रतिष्ठित घराण्याकडे या ऐतिहासिक आणि पवित्र पलंगाची सेवा करण्याचा मान परंपरेने चालत आला आहे. पिढ्यानपिढ्या जतन केलेल्या या धार्मिक व सांस्कृतिक परंपरेनुसार, देवीच्या या मानाच्या पलंगाचे आगमन होताच परिसरातील नागरिकांनी आणि भाविकांनी त्याचे जोरदार स्वागत केले. पारंपरिक वाद्ये, तुतारीचा गजर, जयघोषात आणि पुष्पवृष्टी करत या पवित्र पलंगाचे गावात स्वागत करण्यात आले. यावेळी दर्शनासाठी भाविकांनी मोठी गर्दी केली होती.

या शेकडो वर्षांच्या ऐतिहासिक परंपरेनुसार, देवीचा हा पलंग तयार करण्याचे आणि त्याची सेवा करण्याचे कार्य परंपरेनुसार चालत आले आहे. जुन्नर आणि आळेफाटा परिसरासह विविध गावांमधून हा पलंग प्रवास करत तुळजापूरकडे मार्गस्थ होतो, यादरम्यान रस्त्यावरील विविध गावांमध्ये यात्रेचे व उत्सवाचे स्वरूप येते. भाविक मोठ्या श्रद्धेने या पवित्र पलंगाचे दर्शन घेऊन धन्यता मानतात. या सोहळ्यामुळे संपूर्ण जुन्नर तालुक्यात धार्मिक व सांस्कृतिक चैतन्य पसरले असून, भाविकांमध्ये एकच उत्साह दिसून येत आहे.