नाशिकमध्ये भोंदूबाबाचा प्रताप! ‘पैशांचा पाऊस’ पाडून १५ कोटींच्या परताव्याचे आमिष दाखवत निवृत्त कर्मचाऱ्याची १० लाख ९५ हजारांची फसवणूक!

नाशिक जिल्ह्यातून अंधश्रद्धेचा फायदा घेत नागरिकांची फसवणूक केल्याची एक अत्यंत खळबळजनक घटना समोर आली आहे. अघोरी पूजा आणि मंत्र-तंत्राच्या जोरावर घरात ‘पैशांचा पाऊस’ पाडण्याचे तसेच १ लाखाचे तब्बल १० पट किंवा १५ कोटी रुपयांपर्यंतचा भरगोस परतावा मिळवून देण्याचे मोठे आमिष दाखवून एका निवृत्त महापालिका कर्मचाऱ्यासह त्यांच्या सहकाऱ्यांना तब्बल १० लाख ९५ हजार रुपयांना गंडवल्याचा प्रकार उघडकीस आला आहे. या प्रकरणी पोलिसांनी तातडीने कारवाई करत संबंधित भोंदूबाबासह त्याच्या साथीदारांना बेड्या ठोकल्या आहेत.

भोंदूबाबा गजाआड, पाच दिवसांची पोलिस कोठडी: मिळालेल्या सविस्तर माहितीनुसार, पिंपळे खुर्द (ता. कळवण, जि. नाशिक) येथील तथाकथित भोंदूबाबा हिराचंद शिवाजी बर्डे ऊर्फ राजूब बाबा याने आपल्या काही साथीदारांच्या मदतीने मुंबई येथील काही नागरिकांना आणि एका ६५ वर्षीय निवृत्त कर्मचाऱ्याला आपल्या जाळ्यात ओढले. भोंदूबाबाने त्याच्याकडे दैवी शक्ती असल्याचा दावा करत गुप्त धनाची पूजा करण्याचे नाटक रचले होते. सुरुवातीला एका छोट्या प्रयोगादरम्यान त्याने चलाखीने काही रोकड गायब व प्रकट करून दाखवल्यामुळे संशयित व फिर्यादीचा त्याच्यावर पूर्ण विश्वास बसला.

विश्वास संपादन केल्यानंतर, मोठ्या प्रमाणावर पैशांचा पाऊस पाडण्याच्या विशेष विधीसाठी आणि १५ कोटी रुपयांच्या परताव्याचे स्वप्न दाखवून या भोंदूबाबाने एप्रिल महिन्यात विविध टप्प्यांतून रोख आणि ऑनलाईन माध्यमातून एकूण १० लाख ९५ हजार रुपये उकळले. त्यानंतर आरोपींनी एका गोणीत किंवा पोत्यामध्ये नारंगी कापडात गुंडाळून ३ कोटी रुपये असल्याचे भासवून ती गोणी फिर्यादीकडे दिली आणि सलग सात दिवस घरी त्याची पूजा करण्यास सांगितले. मात्र, घरात शोकांतिका घडल्यामुळे विधी पार पडला नाही, तेव्हा भोंदूबाबाने विधी अशुद्ध झाल्याचे कारण सांगून पुन्हा पैशांची मागणी केली.

गोणीत निघाल्या कागदाच्या रद्दी नोटा: फिर्यादीला संशय आल्याने त्यांनी जेव्हा ती गोणी उघडून पाहिली, तेव्हा त्यांच्या पायाखालची जमीनच सरकली. त्या गोणीत वरच्या बाजूला एक ५०० रुपयाची खरी नोट ठेवून खाली फक्त खेळण्यातील व कागदाच्या रद्दी नोटा भरल्याचे उघडकीस आले. आपली मोठी फसवणूक झाल्याचे लक्षात आल्यानंतर पीडितांनी महाराष्ट्र अंधश्रद्धा निर्मूलन समितीच्या (अंनिस) पदाधिकाऱ्यांशी संपर्क साधला. त्यानंतर अभोणा पोलिस ठाण्यात येऊन तक्रार दाखल करण्यात आली.

पोलिसांनी याप्रकरणी कठोर पावले उचलत मुख्य आरोपी हिराचंद बर्डे आणि त्याच्या साथीदारांविरुद्ध महाराष्ट्र मानवी बळी व इतर अनिष्ट, अघोरी प्रथा व जादूटोणा अधिनियम, २०१३ (जादूटोणाविरोधी कायदा) तसेच फसवणुकीच्या विविध कलमांनुसार गुन्हा दाखल केला आहे. पोलिसांनी मुख्य आरोपीला अटक केली असून न्यायालयाने त्यास पाच दिवसांची पोलिस कोठडी सुनावली आहे. या घटनेमुळे संपूर्ण नाशिक जिल्ह्यात एकच खळबळ उडाली असून अंधश्रद्धेच्या नावाखाली नागरिकांची कशी फसवणूक सुरू आहे, याचा पुन्हा एकदा पर्दाफाश झाला आहे.