नांदेड: नांदेडमध्ये बनावट पोलिसाचा डाव फसला; सतर्क नागरिकामुळे सोन्याची फसवणूक टळली

नांदेड: लोहा-लातूर महामार्गावर बनावट पोलिस बनून सोन्याचे दागिने लंपास करण्याचा प्रयत्न करणाऱ्या भामट्याचा डाव एका सतर्क नागरिकामुळे फसला. संशय आल्याने नागरिकाने तत्परता दाखवत आरोपीला रोखण्याचा प्रयत्न केला. परिस्थिती हाताबाहेर जात असल्याचे लक्षात येताच आरोपी घटनास्थळावरून पळ काढत जवळच्या ऊसाच्या शेतात फरार झाला.

घटनास्थळी आरोपीची दुचाकी, बनावट दागिने तसेच इतर साहित्य आढळून आले. या प्रकाराची माहिती मिळताच पोलिसांनी घटनास्थळी धाव घेत पंचनामा केला आणि जप्त साहित्य ताब्यात घेतले. आरोपीचा शोध घेण्यासाठी परिसरात शोधमोहीम राबविण्यात येत असून, सीसीटीव्ही फुटेज आणि इतर पुराव्यांच्या आधारे तपास सुरू आहे.

या घटनेमुळे महामार्गावर प्रवास करणाऱ्या नागरिकांनी अनोळखी व्यक्तींवर सहज विश्वास ठेवू नये, तसेच स्वतःला पोलीस अधिकारी म्हणून ओळख सांगणाऱ्या व्यक्तीची ओळख खात्री करूनच सहकार्य करावे, असे आवाहन पोलिसांनी केले आहे. बनावट पोलिसांच्या नावाखाली होणाऱ्या फसवणुकीबाबत सतर्क राहण्याची गरज पुन्हा एकदा अधोरेखित झाली आहे.