सातारा: देशसेवेदरम्यान शहीद झालेले वीर जवान रोहित पवार यांच्यावर साताऱ्यातील चिंचणी येथे शासकीय इतमामात अंत्यसंस्कार; साऱ्यांचे डोळे झाले पाणावले

सातारा: चिंचणी, ता. सातारा गावचे सुपुत्र व झाशी येथे ११४ आर्मर्ड इंजिनिअरिंग विभागात नाईक पदावर कार्यरत असलेले जवान रोहित रामचंद्र पवार (वय ३६) यांचे दि. ९ रोजी कर्तव्य बजावत असताना हृदयविकाराच्या धक्क्याने निधन झाले. त्यांच्यावर शुक्रवारी (दि. ११) चिंचणी येथे शासकीय इतमामात अंत्यसंस्कार करण्यात आले. मान्यवरांसह उपस्थित ग्रामस्थांनी त्यांना साश्रू नयनांनी अखेरचा निरोप दिला.

जवान रोहित पवार हे २००९ मध्ये सैन्य दलात भरती झाले होते. सध्या त्यांची झाशी येथे पोस्टिंग होती. कर्तव्य बजावत असताना त्यांना दि. ९ रोजी हृदयविकाराचा धक्का बसल्यानंतर सहकाऱ्यांनी त्यांना तातडीने रुग्णालयात दाखल केले. झाशी येथील मिलिटरी हॉस्पिटलमध्ये उपचार सुरू असताना त्यांचे निधन झाले. त्यांच्या निधनाचे वृत्त समजताच गावावर शोककळा पसरली. त्यांचे पार्थिव येण्याची प्रतिक्षा ग्रामस्थांना होती. अखेर दि. ११ रोजी पार्थिव चिंचणी येथे आणण्यात आले. त्यानंतर शासकीय इतमामात त्यांच्या पार्थिवावर अंत्यसंस्कार करण्यात आले.

 

 

यावेळी खासदार उदयनराजे भोसले, जिल्हा परिषद अध्यक्षा प्रिया शिंदे, उपाध्यक्ष राजू भोसले, जिल्हा परिषद सदस्य जितेंद्र सावंत, महेश गाडे, प्रांताधिकारी आशिष बारकुल तसेच माजी सैनिक संघटनेच्या सदस्यांनी त्यांना श्रद्धांजली वाहिली. रोहित पवार यांच्या पश्चात आई-वडील, पत्नी आणि दोन मुले असा परिवार आहे.

पवार कुटुंब सैन्य दलात
चिंचणी येथील पवार कुटुंबाने देशसेवेला वाहून घेतले आहे. रोहित पवार यांचे वडील रामचंद्र पवार हे सैन्य दलातून सेवानिवृत्त झाले आहेत. त्यांच्या दोन भावांपैकी एक भाऊ सैन्य दलातून निवृत्त झाला आहे, तर दुसरा भाऊ सैन्य दलातून निवृत्तीनंतर पोलिस दलात सेवा बजावत आहे.