पुण्यातील बाणेरमध्ये ड्रग्ज माफियांंचा सुळसुळाट? सेवा रस्त्यावर उघड्यावर सापडल्या वापरलेल्या सिरिंज; नागरिकांमध्ये भीती व संतापाचे वातावरण!

बाणेर (पुणे): शिक्षणाचे माहेरघर आणि आयटी हब म्हणून ओळखल्या जाणाऱ्या पुण्यातील उच्चभ्रू बाणेर-बालेवाडी परिसरात ड्रग्ज माफियांनी आपले जाळे पसरवल्याचा धक्कादायक प्रकार समोर आला आहे. बाणेर येथील हायवे लगतच्या सेवा रस्त्यावर (Service Road) मोठ्या प्रमाणावर वापरलेल्या सिरिंज (ड्रग्जच्या सुया) आणि औषधांच्या रिकाम्या बाटल्या उघड्यावर फेकलेल्या अवस्थेत आढळल्या आहेत. या प्रकारामुळे परिसरात अंमली पदार्थांचे (ड्रग्ज) सेवन करणाऱ्यांचे रॅकेट सक्रिय असल्याचा दाट संशय व्यक्त केला जात असून, स्थानिक नागरिक आणि पालकांमध्ये भीतीचे वातावरण पसरले आहे.

शाळा आणि निवासी परिसराजवळ थेट धोका: ज्या सेवा रस्त्यावर या वापरलेल्या सिरिंज आढळल्या आहेत, त्याच्या अगदी जवळ अनेक नामांकित शाळा, महाविद्यालये आणि मोठी निवासी संकुले (Housing Societies) आहेत. लहान मुले, नागरिक आणि ज्येष्ठ नागरिक या रस्त्यावरून रोज ये-जा करतात. उघड्यावर टाकलेल्या या वापरलेल्या सिरिंजमुळे संसर्गजन्य आजार पसरण्याचा मोठा आरोग्यविषयक धोका निर्माण झाला असून, सार्वजनिक सुरक्षिततेवर गंभीर प्रश्नचिन्ह उपस्थित झाले आहे.

बालेवाडीतील एमडी ड्रग्ज कारवाईची पार्श्वभूमी: काही दिवसांपूर्वीच (२६ जून रोजी) बालेवाडी परिसरात पोलिसांनी मुंबईहून आलेल्या एका कारमधून तब्बल ९८ ग्रॅम मेफेड्रोन (MD) हा अंमली पदार्थ आणि सुमारे ३६ लाख रुपयांचा मुद्देमाल जप्त करून तिघांना अटक केली होती. ही कारवाई ताजी असतानाच आता बाणेरच्या सेवा रस्त्यावर थेट वापरलेल्या सिरिंज मिळून आल्याने या परिसरात ड्रग्ज तस्करी आणि सेव्हन मोठ्या प्रमाणात सुरू असल्याचे स्पष्ट होत आहे.

पोलिसांकडे रात्रीची गस्त व कडक कारवाईची मागणी: रात्रीच्या वेळी निर्जन आणि कमी दिव्यांचा प्रकाश असलेल्या सेवा रस्त्यांचा वापर गर्दुल्ले आणि ड्रग्ज विक्रेते करत असल्याचा आरोप स्थानिकांनी केला आहे. त्यामुळे पुणे पोलिसांनी आणि स्थानिक पोलिस ठाण्याने या परिसरात रात्रीची गस्त (Patrolling) वाढवावी, सीसीटीव्ही फुटेजची तपासणी करावी आणि ड्रग्ज रॅकेट चालवणाऱ्यांवर कठोर कारवाई करून हा परिसर सुरक्षित करावा, अशी तीव्र मागणी नागरिक करत आहेत.