चंद्रपुरात पोलिसांची मोठी कारवाई! मातंग मोहल्ल्यातील घरावर छापा मारून १ किलो गांजा जप्त; तरुण पोलिसांच्या ताब्यात!

 

 

 

चंद्रपूर: आपल्या घरामध्ये बेकायदेशीरपणे गांजाचा साठा बाळगून त्याची चोरटी विक्री करणाऱ्या एका तरुणावर चंद्रपूर शहर पोलिसांनी मोठी कारवाई केली आहे. गुप्त माहितीच्या आधारे पोलिसांनी चंद्रपूर शहरातील बिनबा वॉर्डातील मातंग मोहल्ला परिसरातील एका घरावर अचानक छापा टाकला. या छाप्यात पोलिसांनी घरात लपवून ठेवलेला तब्बल १ किलो गांजा जप्त केला असून याप्रकरणी एका तरुणाला रंगेहाथ अटक करण्यात आली आहे.

१५ हजारांचा मुद्देमाल जप्त: रितीक डोंगरे असे अटक करण्यात आलेल्या आरोपी तरुणाचे नाव आहे. तो आपल्या राहत्या घरात गांजाचा बेकायदेशीर साठा करून तो स्थानिक पातळीवर विकत असल्याची माहिती पोलिसांना मिळाली होती. त्यानुसार शहर पोलिसांच्या पथकाने मातंग मोहल्ला परिसरात सापळा रचून ही कारवाई केली. पोलिसांनी घरातून सुमारे १५ हजार रुपये किमतीचा १ किलो गांजा जप्त केला आहे.

याप्रकरणी पोलिसांनी आरोपीविरुद्ध अंमली पदार्थ विरोधी कायद्यान्वये (NDPS Act) गुन्हा दाखल केला असून, त्याने हा गांजा कुठून आणला आणि या रॅकेटमध्ये आणखी कोणाचा समावेश आहे का, याचा पुढील तपास चंद्रपूर शहर पोलीस करत आहेत.