Dhule | शेतकरी संतापला! थेट ट्रॅक्टरभर मका जिल्हाधिकारी कार्यालयात

नगदी पीक म्हणून ओळखल्या जाणाऱ्या मक्याला यंदा मोठी मागणी असतानाही हमीभावाने खरेदी न झाल्याने शेतकऱ्यांमध्ये संतापाची लाट उसळली आहे. धुळे जिल्ह्यातील शेतकऱ्यांनी थेट जिल्हाधिकारी कार्यालयावर ट्रॅक्टरमधून मका आणत आंदोलन छेडले. सरकारने जाहीर केलेल्या दराने खरेदी होत नसल्याचा आरोप करत शेतकऱ्यांनी प्रशासनाकडे तीव्र नाराजी व्यक्त केली.
शेतकऱ्यांच्या म्हणण्यानुसार, शासनाने प्रतिक्विंटल 24 रुपयांच्या दराने मका खरेदी करण्याचे आश्वासन दिले होते. त्या अनुषंगाने तालुक्यातील सुमारे 1,250 शेतकऱ्यांनी नोंदणी केली. मात्र प्रत्यक्षात केवळ 140 शेतकऱ्यांकडूनच खरेदी करण्यात आल्याचा आरोप करण्यात आला आहे. नोंदणीकृत मक्याचे प्रमाण सुमारे 55 ते 60 हजार क्विंटल इतके असून आतापर्यंत केवळ 5,700 क्विंटल मका खरेदी झाल्याची माहिती शेतकऱ्यांनी दिली. उर्वरित मक्याचे काय करायचे, असा सवाल शेतकऱ्यांनी सरकारला केला आहे. शासनाने जाहीर दराने खरेदी केली असती तर प्रत्येक शेतकऱ्याला अंदाजे दीड लाख रुपयांपर्यंत फायदा झाला असता, असा दावा आंदोलक शेतकऱ्यांनी केला. मात्र खरेदी प्रक्रिया थांबल्याने मोठे आर्थिक नुकसान सहन करावे लागत असल्याचे त्यांनी सांगितले. दरम्यान, प्रशासनाकडून याबाबत अद्याप स्पष्ट भूमिका जाहीर करण्यात आलेली नाही. त्यामुळे पुढील काळात आंदोलन तीव्र होण्याची शक्यता व्यक्त केली जात आहे.