चिपळूण लाचप्रकरण: गरोदर महिलेकडून लाच घेणाऱ्या 'त्या' महिला डॉक्टरची नोकरी धोक्यात! निलंबनाचा प्रस्ताव दाखल, आरोग्य विभागाकडून चौकशी सुरू!

चिपळूण (रत्नागिरी): चिपळूण येथील कामथे उपजिल्हा रुग्णालयात गर्भनिरोधक गोळ्या / अबॉर्शन किट देण्यासाठी एका गरोदर महिलेकडून ४,५०० रुपयांची लाच घेताना रंगेहाथ पकडल्या गेलेल्या वैद्यकीय अधिकारी डॉ. कांचन मदार (Dr. Kanchan Madar) यांच्या अडचणीत मोठी वाढ झाली आहे. या लाचप्रकरणानंतर आता त्यांच्या निलंबनाचा (Suspension) अधिकृत प्रस्ताव जिल्हा रुग्णालय प्रशासनाने आरोग्य उपसंचालकांकडे पाठवला आहे.

काही दिवसांपूर्वी लाचलुचपत प्रतिबंधक विभागाने (ACB) कामथे रुग्णालयात सापळा रचून डॉ. कांचन मदार यांना लाच स्वीकारताना रंगेहाथ अटक केली होती. या धक्कादायक कारवाईमुळे चिपळूण आणि संपूर्ण रत्नागिरी जिल्ह्यात वैद्यकीय क्षेत्रात मोठी खळबळ उडाली होती. सध्या न्यायालयाने त्यांना जामीन मंजूर केला असला, तरी त्यांची शासकीय नोकरी आता पूर्णपणे धोक्यात आली आहे.

डॉ. मदार या वर्ग-२ अ गटातील वैद्यकीय अधिकारी असल्याने त्यांच्यावर थेट निलंबनाची कारवाई करण्याचा अधिकार जिल्हा रुग्णालयाला नाही, त्यामुळे हा अंतिम निर्णय घेण्यासाठीचा प्रस्ताव आरोग्य उपसंचालकांकडे सोपवण्यात आला आहे. यासोबतच आरोग्य विभागाने डॉ. मदार यांच्या विरोधात अंतर्गत विभागीय चौकशी देखील सुरू केली आहे. शासकीय रुग्णालयात मोफत मिळणाऱ्या वैद्यकीय सुविधांसाठी गरीब रुग्णांकडून अशा प्रकारे पैशांची मागणी केली जात असल्याने नागरिकांमधून तीव्र संताप व्यक्त होत आहे.