Amravati : अमरावतीत १८० मुलींना जाळ्यात ओढल्याचा आरोप; हॉटेलमध्ये ३५० अश्लील व्हिडिओंचा धक्कादायक प्रकार, मुंबई-पुण्यात विक्रीचा कट उघड

Amravati : अचलपूर-परतवाडा या जुळ्या शहरांमध्ये अत्यंत धक्कादायक आणि संतापजनक घटना समोर आली आहे. एका संशयिताने प्रेमाचे आमिष दाखवून अनेक युवतींना जाळ्यात ओढत त्यांचे लैंगिक शोषण केल्याचा आरोप आहे. या घटनांचे व्हिडिओ सोशल मीडियावर मोठ्या प्रमाणात व्हायरल झाल्याने परिसरात खळबळ उडाली आहे.

भाजपकडून सुमारे १८० हून अधिक मुलींचे जवळपास ३५० व्हिडिओ असल्याचा दावा करण्यात आला असून, या प्रकरणाची गंभीरता वाढली आहे. नाशिकमधील गाजलेल्या खरात प्रकरणानंतर आता हा प्रकार समोर आल्याने राज्यभरातून संताप व्यक्त होत आहे.

 ब्लॅकमेलिंगचा संशय

मिळालेल्या माहितीनुसार, आरोपीने संबंधित तरुणींसोबतचे खाजगी क्षण स्वतःच चित्रित केले. नंतर हे व्हिडिओ फेसबुक, इन्स्टाग्राम आणि व्हॉट्सॲपवर व्हायरल करण्यात आले. व्हिडिओतील परिस्थिती पाहता, ब्लॅकमेल करून वारंवार शोषण केल्याचा संशय व्यक्त केला जात आहे.

या प्रकरणात एकटाच आरोपी नसून, त्याला काही साथीदारांची मदत असण्याची शक्यता देखील पोलिसांकडून वर्तवली जात आहे.

 आरोपी फरार

घटना उघडकीस येताच संशयित आरोपी कुटुंबासह फरार झाला आहे. त्याच्या घराला सध्या कुलूप असून पोलिसांकडून त्याचा शोध सुरू आहे. अद्याप कोणतीही पीडिता अधिकृतपणे पुढे आलेली नसली तरी व्हायरल व्हिडिओंच्या आधारे पोलिसांनी स्वतःहून गुन्हा दाखल करावा, अशी मागणी होत आहे.

राजकीय स्तरावरही खळबळ

या प्रकरणात खासदार डॉ. अनिल बोंडे यांनी लेखी निवेदन देत महंमद अयान आणि महंमद झोयान या दोन संशयितांवर गंभीर आरोप केले आहेत. त्यांच्या निवेदनानंतर पोलिसांनी चौकशीला वेग दिला असून, दोन्ही आरोपींचा शोध सुरू आहे.

 मानव तस्करीचा संशय

या प्रकरणात आणखी गंभीर बाब समोर आली आहे. सोशल मीडियाच्या माध्यमातून अल्पवयीन मुलींना जाळ्यात ओढून हॉटेलमध्ये नेऊन त्यांचे चित्रीकरण केले जात असल्याचा दावा करण्यात आला आहे. तसेच काही मुलींना मुंबई-पुण्यासारख्या शहरांत विकण्याचा कट रचला जात असल्याचाही संशय व्यक्त केला जात आहे. विरोध करणाऱ्या मुलींना व त्यांच्या कुटुंबीयांना जीवे मारण्याच्या धमक्या दिल्या जात असल्याचेही समोर आले आहे.

 पोलिसांचे आवाहन

अमरावती ग्रामीणचे पोलिस अधीक्षक विशाल आनंद यांनी नागरिकांना आवाहन केले आहे की,

• पीडितांनी न घाबरता पुढे यावे
• कोणत्याही अफवांवर विश्वास ठेवू नये
• सामाजिक सलोखा राखावा

हे प्रकरण अत्यंत संवेदनशील असल्याने पोलिसांकडून सखोल तपास सुरू असून, आरोपींना अटक केल्यानंतर कठोर कारवाई करण्यात येणार आहे.