अमरावती: माणुसकीला काळिमा! ६५ वर्षीय वृद्धेवर २२ वर्षीय नराधमाचा अत्याचार; अवघ्या ११ तासांत आरोपीला बेड्या

अमरावती: अमरावती जिल्ह्यातून एक अत्यंत संतापजनक आणि माणुसकीला काळिमा फासणारी घटना समोर आली आहे. आजारपणाच्या उपचारासाठी दवाखान्यात जाणाऱ्या एका ६५ वर्षीय वृद्ध महिलेला मदतीचे आमिष दाखवून, तिच्यावर एका २२ वर्षीय तरुणाने अत्याचार केल्याचा धक्कादायक प्रकार उघडकीस आला आहे. या नराधमाने अत्याचार केल्यानंतर वृद्धेकडील उपचाराचे ६०० रुपये देखील लुटले. शिरजगाव कसबा पोलिसांनी तांत्रिक तपासाच्या आधारे अवघ्या ११ तासांत या आरोपीच्या मुसक्या आवळल्या आहेत.

नेमकी घटना काय?
पीडित महिला ही महाराष्ट्र-मध्य प्रदेश सीमेवरील एका गावात राहणारी आहे. १८ एप्रिल रोजी सकाळी ही महिला आपल्या आजारपणावर उपचार करण्यासाठी परतवाडा येथे जाण्यासाठी निघाली होती. ती एकटी असल्याचे पाहून आवेज खान युसूफ खान (वय २२) या तरुणाने तिला मदतीचा बहाणा करून आपल्या दुचाकीवर बसवले. तिला रुग्णालयात सोडण्याऐवजी त्याने एका निर्जन ठिकाणी नेले आणि तिथे तिच्यावर जबरदस्तीने अत्याचार केले.

६०० रुपये लुटून पसार:
अत्याचार केल्यानंतर या नराधमाचे मन भरले नाही, त्याने वृद्धेकडे उपचारासाठी असलेले अवघे ६०० रुपये देखील हिसकावून घेतले आणि तिथून पळ काढला. या घटनेनंतर पीडित महिलेने शिरजगाव कसबा पोलीस ठाणे गाठून आपबिती सांगितली.

पोलिसांची तत्परता:
घटनेचे गांभीर्य ओळखून अमरावती पोलीस अधीक्षकांच्या मार्गदर्शनाखाली पथके तयार करण्यात आली. परिसरातील सीसीटीव्ही फुटेज आणि तांत्रिक माहितीच्या आधारे पोलिसांनी आरोपीचा शोध सुरू केला. अवघ्या ११ तासांच्या आत पोलिसांनी आवेज खानला अटक केली.

पीडितेची प्रकृती:
पीडित महिलेला तातडीने अचलपूर येथील उपजिल्हा रुग्णालयात दाखल करण्यात आले आहे. सध्या त्यांच्यावर उपचार सुरू असून त्यांची प्रकृती स्थिर असल्याचे वैद्यकीय सूत्रांनी सांगितले. आजीच्या वयाच्या वृद्धेवर अशा प्रकारे अत्याचार झाल्याने अमरावती जिल्ह्यात तीव्र संताप व्यक्त केला जात आहे.