नागपूर: वृद्ध महिलेवर अत्याचार करून निर्घृण हत्या; नऊ दिवसांच्या तपासानंतर नराधम अटकेत!

नागपूर: जिल्ह्यातील पाटणसावंगी येथे एका वृद्ध महिलेवर अत्याचार करून तिची निर्घृण हत्या करण्यात आल्याची धक्कादायक घटना समोर आली आहे. या प्रकरणाचा तपास करत सावनेर पोलीस आणि स्थानिक गुन्हे शाखेच्या (LCB) पथकाने नऊ दिवसांनंतर आरोपीला बेड्या ठोकल्या आहेत.

काय आहे नेमकी घटना?

२७ जूनच्या रात्री दहेगाव (रंगारी) येथील नागपूर-सावनेर महामार्गाच्या सर्व्हिस रोडवरून ही वृद्ध महिला पायी जात होती.

आरोपी सुधाकर बाबाराव मंडपे (वय ४८) याने तिला गाठले आणि दुचाकीवर बसवून एका निर्जनस्थळी नेले. तिथे आरोपीने त्या महिलेवर अत्याचार करून तिला अमानुष मारहाण केली, ज्यामध्ये तिची आतडी बाहेर येईपर्यंत गंभीर दुखापत झाली आणि तिचा मृत्यू झाला.

 

तपास आणि आरोपीची अटक:

ही घटना एका बसचालकाने पाहिली होती, ज्याची साक्ष पोलिसांसाठी महत्त्वाची ठरली.

पोलिसांनी तांत्रिक पुरावे आणि 'क्रॉस व्हेरिफिकेशन' केल्यानंतर आरोपीला बोखारा येथून ताब्यात घेतले.

सुधाकर मंडपे हा मूळचा ब्राह्मणवाडा येथील रहिवासी असून सध्या टाकळी (भन्साळी) येथे कुटुंबासह राहतो आणि बांधकाम कामगार म्हणून काम करतो.

चौकशीदरम्यान आरोपीने गुन्ह्याची कबुली दिली असून, मृत महिलेच्या हातावर 'गंगाबाई' असे गोंदलेले नाव असले तरी तिची खरी ओळख पटवण्याचे काम सुरू आहे.