खाकी वर्दीला कलंक! अल्पवयीन मुलीचे शोषण करून आत्महत्येस प्रवृत्त करणारा फरार पोलीस कर्मचारी अखेर नांदेडमधून जेरबंद, बाळापूर पोलिसांची मोठी कारवाई"

 

अकोला जिल्ह्यातील बाळापूर शहरातून एक अत्यंत संतापजनक आणि खाकी वर्दीला काळीमा फासणारी घटना समोर आली होती. अल्पवयीन मुलीचे लैंगिक शोषण करून तिला आत्महत्येस प्रवृत्त केल्याप्रकरणी मागील २२ दिवसांपासून फरार असलेला मुख्य आरोपी तथा नराधम पोलिस कॉन्स्टेबल पवन वडगावे याला अकोला पोलीस व स्थानिक गुन्हे शाखेच्या संयुक्त पथकाने मोठ्या शिताफीने नांदेड जिल्ह्यातून अटक केली आहे. या कारवाईमुळे सर्वसामान्य नागरन्कांकडून समाधान व्यक्त केले जात आहे.

घटनेची पार्श्वभूमी व तपासातील धाडसी सत्र:

• नेमके प्रकरण काय होते?: आरोपी पोलीस कर्मचारी पवन वडगावे याने एका अल्पवयीन मुलीला विवाहाचे आमिष दाखवून तिचे लैंगिक शोषण केले होते. त्यानंतर त्याने फसवणूक करत लग्नास स्पष्ट नकार दिला, ज्यामुळे आलेल्या तीव्र मानसिक धक्क्यातून आणि नैराण्यातून त्या पीडित मुलीनं टोकाचं पाऊल उचलत आत्महत्या केली होती. या घटनेमुळे अकोला जिल्ह्यात प्रचंड संताप व्यक्त करण्यात आला होता.

• तीव्र आंदोलने आणि जनक्षोभ: या गंभीर प्रकरणात आरोपी पोलिसावर 'पोक्सो' (POCSO) व आत्महत्येस प्रवृत्त केल्याप्रकरणी गुन्हा दाखल झाल्यानंतर तो तात्काळ फरार झाला होता. आरोपीला त्वरित अटक करावी आणि त्याच्या पाठीशी असणाऱ्यांवर कठोर कारवाई व्हावी, यासाठी बाळापूर शहरात सर्वधर्मीय व सर्वपक्षीय नागरिकांमार्फत भव्य मोर्चे, रास्तारोको आणि तीव्र आंदोलने करण्यात आली होती.

• सतत बदलत होता मोबाईल आणि सिमकार्ड: गुन्हा घडल्यापासून आरोपी पवन वडगावे हा पोलिसांना सತत चकवा देत होता. पोलिसांची दिशाभूल करण्यासाठी तो वारंवार आपले मोबाईल हँडसेट आणि सिमकार्ड बदलत होता. मात्र, अकोला पोलीस अधीक्षक व स्थानिक गुन्हे शाखेच्या पथकाने तांत्रिक विश्लेषण आणि गुप्त बातमीदारांच्या आधारे त्याचा माग काढला.

• नांदेडमध्ये सापळा रचून अटक: आरोपी नांदेड भागात लपून बसल्याची खात्रीशीर माहिती मिळाल्यानंतर, बाळापूर पोलिस व स्थानिक गुन्हे शाखेच्या विशेष पथकाने नांदेड येथे संयुक्त धडक कारवाई करत त्याला बेड्या ठोकल्या. या प्रकरणाचा पुढील कसून तपास पोलीस करत असून, या नराधमाला कठोर कायदेशीर शिक्षा मिळवून देण्यासाठी न्यायालयात भक्कम पुरावे सादर केले जाणार आहेत.