सोलापूर: पैशांच्या वादातून वडदेगावात थरार; ३८ वर्षीय तरुणाची निर्घृण हत्या, आरोपींना बेड्या

सोलापूर: सोलापूर जिल्ह्यातील मोहोळ तालुक्यातील वडदेगाव परिसरात पैशांच्या किरकोळ वादातून एका तरुणाची निर्घृण हत्या झाल्याची धक्कादायक घटना समोर आली आहे. या घटनेत दत्ता नागनाथ बागल (वय ३८) या तरुणाचा मृत्यू झाला असून, एक तरुण गंभीर जखमी झाला आहे. याप्रकरणी कामती पोलिसांनी दोन आरोपींना अटक केली आहे.

नेमकी घटना काय?
वडदेगाव येथील विठ्ठल बागल यांच्या शेतात महादेव गुंड नावाचा गडी कामाला आहे. महादेवने गावातीलच मंगेश सुरेश डोंगरे याच्याकडे आपले उसने दिलेले पैसे मागितले होते. पैसे मागितल्याचा राग मंगेशच्या मनात होता. याच वादातून सोमवारी सकाळी मंगेश डोंगरे आणि त्याचा साथीदार समर्थ जगताप हे वडदेगाव-औंढी रोडवरील कालव्यावर पोहोचले.

निर्घृण हत्या आणि हल्ला:
तिथे चर्चा सुरू असताना वादाची ठिणगी पडली. मंगेशने दत्ता बागल यांना शिवीगाळ करत त्यांच्यावर धारदार चाकूने पोटावर आणि छातीवर सपासप वार केले. रक्ताच्या थारोळ्यात दत्ता तिथेच कोसळले आणि त्यांचा मृत्यू झाला. आपल्या मामाला वाचवण्यासाठी आलेला समाधान जाधव (वय २५) याच्यावरही आरोपीने हल्ला केला. समाधान सध्या गंभीर जखमी असून त्याच्यावर सोलापूरच्या खासगी रुग्णालयात उपचार सुरू आहेत.

पोलिसांची कारवाई:
घटनेची माहिती मिळताच कामती पोलिसांनी वेगाने सूत्रे हलवून मुख्य आरोपी मंगेश डोंगरे आणि त्याचा साथीदार समर्थ जगताप या दोघांनाही अटक केली आहे. विठ्ठल बागल यांच्या फिर्यादीवरून हत्येचा आणि खुनाचा प्रयत्न केल्याचा गुन्हा दाखल करण्यात आला आहे. पैशांच्या किरकोळ वादातून झालेल्या या हत्येमुळे संपूर्ण मोहोळ तालुक्यात खळबळ उडाली असून भीतीचे वातावरण आहे.