सौंदर्य असं की निर्मात्यांची लागायची लाईन, इंडस्ट्रीत येताच बदललं नाव, पण 36 व्या वर्षी घेतला जगाचा निरोप

Madhubala Birthday : हिंदी चित्रपटसृष्टीच्या इतिहासात मधुबाला या नावाला आजही अपार प्रेम मिळत आहे. सौंदर्य आणि नजाकतीची ओळख बनलेल्या मधुबालाच्या वैयक्तिक आयुष्यात मात्र संघर्ष, जबाबदाऱ्या आणि कठीण परिस्थितींचा सामना होता. या सर्व अडचणींवर मात करत तिने यशाचा शिखर गाठला आणि हिंदी सिनेमात आपली अमिट छाप सोडली.

14 फेब्रुवारी 1933 रोजी दिल्ली येथे एका पश्तून मुस्लिम कुटुंबात तिचा जन्म झाला. तिचे खरे नाव मुमताज जहां बेगम देहलवी होते. घरची आर्थिक परिस्थिती अत्यंत हलाखीची असल्याने लहान वयातच तिच्यावर कुटुंबाची जबाबदारी आली. अभिनयाची वाट तिने छंद म्हणून नाही तर कुटुंबाचा उदरनिर्वाह करण्यासाठी निवडली होती.

वयाच्या अवघ्या नऊव्या वर्षी तिने चित्रपटांमध्ये काम करण्यास सुरुवात केली. त्या काळात एका लहान मुलीसाठी कॅमेऱ्यासमोर उभे राहणे सोपे नव्हते; परंतु परिस्थितीशी दोन हात करण्यासाठी तिने धैर्याने हे पाऊल उचलले. 1942 साली प्रदर्शित झालेल्या बसंत या चित्रपटातून तिच्या कारकिर्दीला खरी दिशा मिळाली. याच चित्रपटानंतर तिचे नाव मुमताजवरून ‘मधुबाला’ असे ठेवण्यात आले. त्यानंतर तिने अनेक चित्रपटांमध्ये काम करत अल्पावधीतच स्वतःची ओळख निर्माण केली. निर्मात्यांची त्या पहिली पसंती बनली आणि तिच्याकडे चित्रपटांच्या ऑफर्सचा ओघ सुरू झाला.

स्वत: ठरवायची मानधन

1950 चे दशक हे मधुबालाच्या कारकिर्दीचे सुवर्णयुग मानले जाते. महल, तराना, हावड़ा ब्रिज, चलती का नाम गाड़ी आणि हाफ टिकट यांसारख्या चित्रपटांनी तिला सुपरस्टारचा दर्जा मिळवून दिला. रोमँटिक, भावनिक किंवा विनोदी भूमिका असो त्या प्रत्येक भूमिकेला तिने सहजसुंदर सादरीकरणाने खुलवले. त्या काळात अभिनेत्रींसाठी भूमिका मर्यादित असतानाही मधुबालाने स्वतःच्या अटींवर काम केले आणि आपले मानधनही स्वतः ठरवले.

तिच्या यशाचा सर्वोच्च टप्पा म्हणजे मुगल-ए-आजम हा चित्रपट. हिंदी सिनेमातील ऐतिहासिक चित्रपटांमध्ये या चित्रपटाची गणना होते. या चित्रपटाच्या चित्रीकरणादरम्यान ती गंभीर हृदयविकाराने त्रस्त होती. तरीही तिने चित्रीकरण पूर्ण केले. अनेकदा सेटवर तिची तब्येत बिघडत असे; मात्र कामाबद्दलची निष्ठा तिने कधीही कमी होऊ दिली नाही.