या चित्रपटातून सुरु झालेली रश्मिका-विजय यांची लव्ह स्टोरीची सुरुवात, ठरला होता ब्लॉकबस्टर

Rashmika-Vijay Wedding: दाक्षिणात्य चित्रपटसृष्टीतील लोकप्रिय अभिनेता विजय देवरकोंडा आणि अभिनेत्री रश्मिका मंदाना यांची लव्हस्टोरी एखाद्या रोमँटिक चित्रपटालाही मागे टाकणारी ठरली आहे. मैत्रीतून सुरू झालेलं हे नातं हळूहळू प्रेमात बदललं आणि अनेक वर्षे त्यांनी ते अतिशय खासगी ठेवले. कधी एकसारख्या लोकेशनवरील सुट्ट्यांचे फोटो तर कधी सार्वजनिक कार्यक्रमांतील छोट्या क्षणांमुळे चाहत्यांना त्यांच्या नात्याची चाहूल लागत राहिली. आता दोघांनी आपल्या लग्नाला ‘द वेडिंग ऑफ वीरोश’ असं नाव देत आयुष्याची नवी सुरुवात जाहीर केली असून त्यांच्या प्रेमकथेची पुन्हा जोरदार चर्चा रंगली आहे.

विजय आणि रश्मिका यांची पहिली भेट 2018 साली Geetha Govindam या चित्रपटाच्या शूटिंगदरम्यान झाली. या चित्रपटातील त्यांच्या ऑन-स्क्रीन केमिस्ट्रीने प्रेक्षकांची मनं जिंकली. चित्रपट प्रदर्शित होताच दोघांच्या डेटिंगच्या चर्चांना उधाण आलं. चाहत्यांना ही जोडी केवळ पडद्यावरच नाही तर प्रत्यक्ष आयुष्यातही खास असल्याची जाणीव होऊ लागली.

‘डिअर कॉम्रेड’मुळे वाढली जवळीक

2019 मध्ये दोघे पुन्हा Dear Comrade या चित्रपटात एकत्र दिसले. हा एक तीव्र भावनिक प्रेमकथा असलेला चित्रपट होता. या काळात दोघांमधील मैत्री अधिक घट्ट झाल्याचं बोललं जातं. त्यावेळी रश्मिका वैयक्तिक आयुष्यातील कठीण टप्प्यातून जात होती आणि विजय तिच्यासाठी मोठा आधार ठरल्याच्या चर्चा रंगल्या. इथूनच त्यांच्या नात्याला अधिक बळ मिळालं.

2020 ते 2022 दरम्यान विजय आणि रश्मिका अनेकदा विमानतळावर, कुटुंबीयांच्या कार्यक्रमांत एकत्र दिसले. मात्र प्रत्येक वेळी त्यांनी आम्ही फक्त चांगले मित्र आहोत असंच सांगितलं. तरीही चाहत्यांच्या नजरा चुकल्या नाहीत. मालदीव, रोमसारख्या ठिकाणांहून शेअर केलेल्या सुट्ट्यांच्या छायाचित्रांमधील एकसारखी पार्श्वभूमी पाहून सोशल मीडियावर चर्चा रंगली की त्यांचं नातं मैत्रीच्या पुढे गेलं आहे.

‘अॅनिमल’ प्रमोशनमधील व्हायरल क्षण

2023 मध्ये रश्मिकाच्या Animal या चित्रपटाच्या प्रमोशनदरम्यान एक मजेशीर प्रसंग घडला. अभिनेता रणबीर कपूरने गंमतीने रश्मिकाला विजयला स्पीकरवर कॉल करण्यास सांगितले. फोनवर विजयने कॅज्युअल अंदाजात केलेलं बोलणं आणि रश्मिकाचा लाजलेला चेहरा सोशल मीडियावर प्रचंड व्हायरल झाला. त्या एका क्षणाने चाहत्यांचा संशय अधिकच बळावला.

2025 मध्ये हैदराबादमध्ये विजयच्या घरी खासगी समारंभात दोघांनी साखरपुडा केल्याची बातमी समोर आली. अधिकृत फोटो शेअर केले गेले नसले तरी सार्वजनिक कार्यक्रमांत दोघांच्या हातात एंगेजमेंट रिंग दिसल्याने चर्चा रंगल्या.