डोनाल्ड ट्रम्प संतापले, या देशात पाठवले थेट टॉपचे अमेरिकन सैनिक; मोठं कारण आलं समोर

गेल्या काही काळापासून जगातील अनेक देशांमध्ये अशांतता निर्माण झालेली आहे. 2025 मध्ये अनेक देशांमध्ये युद्ध देखील पेटले होते. अशातच आता डोनाल्ड ट्रम्प यांनी नायजेरियात शांतता प्रस्थापित करण्यासाठी मोठं पाऊल उचलले आहे. अलिकडेच सुमारे 100 अमेरिकन सैन्य आणि संबंधित उपकरणे नायजेरियात पाठवण्यात आले आहेत. आगामी काळात आणखी 100 सैनिक नायजेरियात दाखल होणार आहेत. नायजेरियन सैन्याच्या प्रवक्त्या मेजर जनरल समैला उबा यांनी सांगितले की, सैन्य प्रशिक्षण, तांत्रिक सहाय्य आणि गुप्तचर माहिती शेअर करण्यासाठ हे सैनिक आले आहेत. महत्त्वाची बाब म्हणजे अमेरिकन सैन्य थेट दहशतवादाविरोधातील लढाईत सहभागी होणार नसून नायजेरियन सैन्याच्या हातातच नेतृत्व राहणार आहे.

डोनाल्ड ट्रम्प यांनी नायजेरियात सैन्य पाठवले

नायजेरियन सरकारच्या औपचारिक विनंतीनंतर अमेरिकेने हे सैनिक तैणात करण्यात आल्याची माहिती समोर आली आहे. नायजेरियाचे सैन्य सध्या दहशतवाद्यांशी लढत आहे. बोको हराम, इस्लामिक स्टेट वेस्ट आफ्रिका प्रांत (ISWAP), लकुरावा आणि इतर सशस्त्र टोळ्या नायजेरियात सक्रीय आहेत. बोर्नो, योबे आणि अदामा सारख्या ईशान्येकडील प्रदेशांमध्ये दररोज हल्ले, अपहरण आणि हत्या होत आहेत. या भागात शेकडो लोकांची हत्या झालेली आहे.

नायजेरियात हिंसाचार वाढला

नायजेरियात हिंसाचार वाढत असताना अमेरिकन सैन्य देशात दाखल झाले आहे. गेल्या आठवड्यात मोटारसायकलवरून आलेल्या बंदूकधारींनी तीन गावांमध्ये घुसून 46 जणांची हत्या केली होती. तसेच नायजर राज्यातील कोंकोसो गावात झालेल्या हत्याकांडात 38 जणांची निर्घृण हत्या करण्यात आली होती.

नायजेरियावर ट्रम्प यांचा दबाव

2025 च्या दुसऱ्या सहामाहीत डोनल्ड ट्रम्प यांनी नायजेरियावर दबाव टाकला होता. नायजेरियातील ख्रिश्चनांचा नरसंहार होत आहे, मात्र सरकार त्यांचे रक्षण करण्यात अपयशी ठरत असल्याचे ट्रम्प यांनी म्हटले होते. यामुळे डिसेंबर 2025 मध्ये ख्रिसमसच्या दिवशी अमेरिकन सैन्याने वायव्य नायजेरियातील इस्लामिक स्टेटशी संलग्न असलेल्या लक्ष्यांवर क्षेपणास्त्र हल्ले केले होते. यानंतर दोन्ही देशांमधील तणाव वाढला होता, मात्र आता परिस्थिती निवळली आहे. त्यामुळेच ट्रम्प यांनी या देशात सैन्य पाठवले आहे.