गडाख कुटुंबियांच्या सुरक्षेत वाढ; धमकीच्या निषेर्धात नेवाश्यात मुकमोर्चा

दोन दिवसांपुर्वी शंकरराव गडाख आणि त्यांचे चिरंजीव उदयन गडाख यांना जीवे मारण्याची धमकीचा संवाद असलेली ऑडिओ क्लिप सोशल मीडियावर व्हायरल झाली होती. याची पोलिसांनी गांभीर्याने दखल घेतली असून राहुल राजळेंवरील हल्ल्याचा आणि व्हायरल झालेल्या ऑडिओ क्लिपचा संबध आहे का? याबाबत पोलिसांनी तपास सुरू केला आहे.

शंकरराव गडाख यांचे स्वीय साहाय्याक राहुल राजळे यांच्यावर शुक्रवारी प्राणघातक हल्ला झाला होता. राहुल राजळे यांच्यावर हल्ला करणाऱ्या नितीन शिरसाठला पोलिसांनी शेवगाव बस स्थानकावरून ताब्यात घेण्यात आलं आहे. दरम्यान याच प्रकरणातील संतोष भिंगारदिवे या दुसऱ्या संशयित आरोपीस स्थानिक गुन्हे शाखेच्या पथकाने पुणे जिल्ह्यातील धानोरी येथुन ताब्यात घेतलं आहे. व्हायरल झालेली ऑडिओ क्लिपबाबत तपास सुरू करण्यात आला असल्याची माहिती पोलीस अधीक्षक मनोज पाटील यांनी दिली.

दरम्यान मंत्री गडाख व त्यांचे पुत्र उदयन यांना घरात घुसून गोळ्या घालू अशी धमकी देण्यात आल्याने या गंभीर घटनेचा निषेध म्हणून आज संपुर्ण नेवासा तालुक्यात कडकडीत बंद पाळण्यात आला. आज गावात निषेध सभा झाली. संतप्त ग्रामस्थ व युवकांनी पोलिस प्रशासनाच्या विरोधात घोषणा दिल्या. याबराेबरच नेवासा तालुक्यातील नेवासा, कुकाणा, सोनई, घोडेगाव, वडाळा, चांदा या गावातून मुकमोर्चा काढून निषेध व्यक्त करण्यात आला.