ॲनालॉग की अस्सल पनीर? फसवणूक टाळण्यासाठी 'या' सोप्या ट्रीक्स वापरून ओळखा भेसळयुक्त पनीर!

अन्न व औषध प्रशासनाकडून (FDA) अन्नपदार्थांमधील भेसळ रोखण्यासाठी सुरू असलेल्या धडक कारवायांमुळे अनेकांचे धाबे दणाणले आहेत. बाजारात मिळणाऱ्या अनेक अन्नपदार्थांमध्ये भेसळ असल्याचे समोर येत असून, त्यात 'पनीर' हा एक महत्त्वाचा पदार्थ आहे. सध्या बाजारात अस्सल पनीरच्या नावाखाली 'ॲनालॉग' (बनावट) पनीर मोठ्या प्रमाणावर खपवले जात आहे. अस्सल आणि ॲनालॉग पनीरमधील फरक ओळखणे ग्राहकांसाठी कठीण झाले आहे, मात्र काही सोप्या पद्धतींनी तुम्ही ही फसवणूक टाळू शकता.

अस्सल आणि ॲनालॉग पनीरमधील मुख्य फरक:

१. घटक (Ingredients):

• अस्सल पनीर: हे पूर्णपणे शुद्ध दुधापासून आणि सायट्रिक ॲसिड किंवा लिंबाच्या रसाचा वापर करून तयार केले जाते.

• ॲनालॉग पनीर: यामध्ये दुधाचा वापर नसून पाम तेल, वनस्पती तूप, स्टार्च आणि विविध कृत्रिम घटक (Additives) वापरले जातात.

२. पोत आणि चव (Texture and Taste):

• अस्सल पनीर: हे मऊ, गुळगुळीत असते आणि त्याची चव नैसर्गिक दुधासारखी लागते.

• ॲनालॉग पनीर: हे रबरासारखे कडक असू शकते आणि खाताना ते चिकट किंवा कृत्रिम वाटू शकते.

३. शिजवताना होणारा बदल (Cooking behavior):

• अस्सल पनीर: शिजवताना ते हलकेच मऊ पडते आणि रंगाला हलके तपकिरी होते.

• ॲनालॉग पनीर: गरम पाण्यात किंवा भाजीमध्ये टाकल्यास हे पनीर जास्त पाणी सोडते आणि असमानपणे वितळते.

ग्राहकांसाठी महत्त्वाची टीप: नियमांनुसार, जर एखादे हॉटेल किंवा रेस्टॉरंट दुधाच्या पनीरऐवजी वनस्पती तेलापासून बनवलेले 'ॲनालॉग पनीर' वापरत असेल, तर तसा स्पष्ट फलक लावणे बंधनकारक आहे. मात्र, अनेक ठिकाणी या नियमांना धाब्यावर बसवून ग्राहकांना अस्सल पनीरच्या नावाखाली आरोग्याला घातक ठरणारे बनावट पनीर विकले जात आहे. त्यामुळे खरेदी करताना किंवा हॉटेलमध्ये पनीरचे पदार्थ खाताना सावधगिरी बाळगणे गरजेचे आहे.