पुणे: लिफ्टमध्ये थुंकल्याचा जाब विचारला अन् महिलेने चाकूने केले वार; पिंपरी-चिंचवड हादरले

नेमकी घटना काय? पिंपरी-चिंचवड परिसरात एका इमारतीच्या लिफ्टमध्ये ही घटना घडली. लिफ्टमध्ये एका महिलेने आणि तिच्यासोबत असलेल्या अल्पवयीन मुलाने लिफ्टमधील 'शू रॅक'वर थुंकले. हे कृत्य पाहून तेथून जाणाऱ्या एका दाम्पत्याने त्यांना हटकले आणि असे का करत आहात, असा जाब विचारला.
हा साधा प्रश्न संबंधित महिला आणि मुलाला इतका जिव्हारी लागला की, त्यांनी तातडीने वाद घालण्यास सुरुवात केली.

धारदार चाकूने हल्ला: वादाचे रूपांतर काही क्षणातच हाणामारीत झाले. रागाच्या भरात त्या महिलेने आणि तिच्यासोबत असलेल्या अल्पवयीन मुलाने त्या जोडप्यावर धारदार चाकूने जीवघेणा हल्ला केला.
या अचानक झालेल्या हल्ल्यात संबंधित दाम्पत्य गंभीर जखमी झाले असून, त्यांना तातडीने उपचारासाठी रुग्णालयात दाखल करण्यात आले आहे.

 

पोलीस कारवाई:या घटनेची माहिती मिळताच स्थानिक पोलिसांनी तातडीने घटनास्थळी धाव घेतली. सीसीटीव्ही फुटेज आणि प्रत्यक्षदर्शींच्या जबाबावरून पोलिसांनी संबंधित महिलेला अटक केली आहे, तर तिच्यासोबत असलेल्या अल्पवयीन मुलाला ताब्यात घेतले आहे.

या घटनेमुळे परिसरात तीव्र संताप व्यक्त केला जात असून, लिफ्टसारख्या सार्वजनिक ठिकाणी अशा प्रकारे हिंसक घटना घडल्याने रहिवाशांमध्ये दहशतीचे वातावरण आहे.