पुणे: मद्यधुंद पोलीस कॉन्स्टेबलचा कारनामा! पुण्यामध्ये पोलीस व्हॅनने अनेक वाहनांना दिली धडक, सुदैवाने जीवितहानी टळली

पुणे: केंद्रीय गृहमंत्री यांच्या दौऱ्याच्या बंदोबस्तावर जाताना मद्यधुंद अवस्थेतील एका पोलीस हवालदाराचे पोलिस व्हॅनवरील नियंत्रण सुटल्याने व्हॅनने चार वाहनांना धडक दिल्याची घटना टिळक रस्त्यालगतच्या देशमुखवाडीत शुक्रवारी (दि. ३१) सायंकाळी घडली. अपघातात दोन कार, एक तीनचाकी टेम्पो आणि एका दुचाकीचे मोठे नुकसान झाले. सुदैवाने धडक बसलेल्या वाहनांमध्ये कोणीही नसल्याने मोठी जीवितहानी टळली.

या प्रकरणी विश्रामबाग पोलिसांनी पोलिस हवालदार बाळासाहेब वसंत खैरे (वय ५२) याच्याविरोधात गुन्हा दाखल करून त्याला ताब्यात घेतले आहे. खैरे हा पोलिसांच्या मोटार वाहन विभागात कार्यरत आहे. या संदर्भात अभिषेक गोविंद लिमये (वय ३८, रा. देशमुखवाडी, सदाशिव पेठ) यांनी विश्रामबाग पोलिस ठाण्यात फिर्याद दिली आहे.

पोलिसांनी दिलेल्या माहितीनुसार, केंद्रीय गृहमंत्री अमित शाह यांच्या शनिवारी होणाऱ्या पुणे दौऱ्याच्या पार्श्वभूमीवर टिळक रस्त्यावर मोठा पोलिस बंदोबस्त तैनात करण्यात आला होता. शुक्रवारी सायंकाळी या परिसरात वाहतूक कोंडी झाल्याने खैरे याने पोलीस व्हॅन देशमुखवाडीतील अरुंद गल्लीतून नेण्याचा प्रयत्न केला. त्यावेळी रस्त्याच्या कडेला उभ्या असलेल्या एका कारला त्याने जोरदार धडक दिली. त्या धडकेमुळे संबंधित कार पुढील कार आणि टेम्पोवर आदळली. त्यानंतरही खैरे याने व्हॅन पुढे नेत पुन्हा त्या कारला धडक दिली आणि भिकारदास मारुती रस्त्याच्या दिशेने जाण्याचा प्रयत्न केला.

दरम्यान, चैतन्य साठे आणि विश्वनाथ लिमये यांनी पोलीस व्हॅन अडवून चालकाला पकडून ठेवले. घटनेची माहिती मिळताच विश्रामबाग पोलिसांचे पथक घटनास्थळी दाखल झाले. या अपघातात अभिषेक लिमये व कुंदन साठे यांच्या कार, अद्वैत खळदकर यांची दुचाकी तसेच विश्वनाथ लिमये यांच्या तीनचाकी टेम्पोचे मोठे नुकसान झाले. विश्रामबाग पोलिस ठाण्याचे वरिष्ठ पोलिस निरीक्षक नवनाथ जगताप यांनी सांगितले की, चालकाची वैद्यकीय तपासणी करण्यात आली असून, त्यामध्ये त्याने मद्यप्राशन केल्याचे निष्पन्न झाले आहे. या प्रकरणी त्याच्याविरोधात मोटार वाहन अधिनियम १९८८ मधील कलम १८४ व १८५ तसेच भारतीय न्याय संहितेच्या कलम २८१, ३२४ (४) आणि ३२४ (५) अन्वये गुन्हा दाखल करण्यात आला आहे.