उत्तर प्रदेश: 'बायकोने मृतदेहाला स्पर्शही करायचा नाही, माझा आत्मा…', भाचीला सुसाइड नोट पाठवत जिम संचालक व कॉलेज लिपिकाने स्वतःला संपवले

उत्तर प्रदेश: सर्वांसमोर आनंदी आणि उत्साही राहणाऱ्या व्यक्तीच्या मनात नेमकं काय सुरू आहे आणि खासगी आयुष्यात तो कोणत्या मानसिक व कौटुंबिक संकटांचा सामना करत आहे, याचा अंदाज बांधणे अनेकदा कठीण होते. काहीही न बोलता अचानक समोर येणाऱ्या अशा व्यक्तीबद्दल एके दिवशी अत्यंत धक्कादायक माहिती समोर येते. उत्तर प्रदेशातील सहारनपूर जिल्ह्यातून अशीच एक मन हेलावून टाकणारी आणि थरारक घटना समोर आली आहे, जिथे एका ५२ वर्षीय व्यक्तीने स्वतःला गोळ्या झाडून आपले जीवन संपवले आहे.

मृत व्यक्तीची ओळख देवदत्त शर्मा अशी पटली असून, ते एका महाविद्यालयात लिपिक (क्लर्क) म्हणून काम करत होते आणि सोबतच आपल्या घरामागे असलेली 'रॉक जिम' देखील चालवत होते. ते एक बॉडी बिल्डर देखील होते. देवदत्त शर्मा यांनी टोकाचे पाऊल उचलल्याची माहिती समोर आल्यानंतर परिसरात एकच खळबळ उडाली. घटनेची माहिती मिळताच पोलिसांनी तात्काळ घटनास्थळी धाव घेत त्यांना उपचारासाठी रुग्णालयात दाखल केले; परंतु डॉक्टरांनी तपासणी केल्यानंतर त्यांना मृत घोषित केले.

पोलिसांनी मृतदेह ताब्यात घेऊन तो उत्तरमृत्यूपरीक्षणासाठी (पोस्टमॉर्टमसाठी) पाठवला असून सहाय्यक सर्कल अधिकारी पवन कुमार यांच्या मार्गदर्शनाखाली या प्रकरणाचा सखोल तपास सुरू आहे. प्राथमिक तपासात समोर आलेल्या माहितीनुसार, आत्महत्या करण्यापूर्वी देवदत्त शर्मा यांनी त्यांची २१ वर्षीय भाची नेहा शर्मा हिच्या मोबाईलवर एक अत्यंत सविस्तर आणि धक्कादायक मेसेज (सुसाइड नोट) पाठवला होता. या मेसेजमध्ये त्यांनी गेल्या काही काळापासून आपल्याला मानसिक त्रास आणि अपमानास्पद वागणूक मिळत असल्याची भावना व्यक्त केली होती.

त्यांनी मेसेजमध्ये लिहिलं होतं की, "हा अपमान आता माझ्या सहन होण्यापलिकडे गेला आहे आणि सतत मरत जगण्यापेक्षा मी एकदाच माझे आयुष्य संपवत आहे..." या सुसाइड नोटमधील मजकुराने सर्वांनाच चक्कीत केले आहे. देवदत्त शर्मा यांनी आपल्या मेसेजमध्ये काही अत्यंत कडक आणि अंतिम इच्छा देखील व्यक्त केल्या होत्या. त्यांनी लिहिले होते की, "माझ्या बायकोने माझ्या मृतदेहाला हात देखील लावू नये. अंतिमसंस्कारासाठी जास्त खर्च करू नका, तसेच माझ्या आत्म्याच्या शांतीसाठी कोणतीही धार्मिक विधी किंवा पूजा करण्याची गरज नाही." एवढेच नव्हे तर, आपला आत्मा भटकत राहावा, अशी संतापजनक इच्छाही त्यांनी त्यामध्ये व्यक्त केली होती. तसेच, त्यांनी आपल्या भाचीला त्यांच्या आईची काळजी घेण्याची विनंती केली होती.

या अंगावर काटा आणणाऱ्या सुसाइड नोटची माहिती समोर आल्यानंतर मृतकाच्या कुटुंबियांमध्ये तीव्र शोककळा पसरली असून नातेवाईकही हादरले आहेत. पोलीस आता या मोबाईल मेसेजला तपासाचा एक अत्यंत महत्त्वाचा पुरावा मानून कौटुंबिक कलह, वैवाहिक वाद किंवा इतर सर्व संभाव्य बाजूंनी कसून तपास करत आहेत.