Nashik : सिंहस्थासाठी नाशिकमध्ये बाह्य रिंगरोड; शहरालगतच्या गावांतून ६६ किमी लांब मार्ग, मात्र निम्म्या गावांत तीव्र विरोध

Nashik : सिंहस्थ कुंभमेळ्याच्या पार्श्वभूमीवर बाह्य रिंगरोड उभारणीचा प्रकल्प हाती घेण्यात आला आहे. पण २५ पैकी १३ गावांमध्ये मोजणीला थेट विरोध सुरू आहे. त्यामुळे या गावांमध्ये अद्यापपर्यंत मोजणीला सुरुवात होऊ शकलेली नाही.

25 गावांमधून जाणार रिंगरोड
नाशिक आणि त्र्यंबकेश्वरमध्ये लाखोंच्या संख्येने भाविक येण्याची शक्यता आहे. सन २०१५ मध्ये झालेल्या कुंभमेळ्याच्या तुलनेत यंदा पाचपट अधिक भाविक येतील, या दृष्टीने प्रशासकीय यंत्रणांनी नियोजन सुरू केले आहे. भाविकांची गर्दी वाढल्यास वाहतूक कोंडी होण्याची शक्यता आहे. ही कोंडी टाळण्यासह भाविकांची व शहरातील नागरिकांची गैरसोय होऊ नये याकरिता शहरालगतच्या गावांमधून बाह्य रिंगरोड (परिक्रमा मार्ग) निर्माण करण्याचा निर्णय केंद्र आणि राज्य सरकारने घेतला आहे. शहरालगतच्या २५ गावांमधून हा रिंगरोड जाणार असून, तो ६६ किलोमीटरचा असेल.

या रिंगरोडकरिता जिल्हा प्रशासनाला शेतकऱ्यांच्या खासगी जमिनींची आवश्यकता आहे. साधारणत: १ हजार २०० शेतकऱ्यांची ३६५ हेक्टर जमीन संपादित करण्यात येणार आहे. त्यामुळे जिल्हा प्रशासनाकडून भूसंपादनाची प्रक्रिया राबविण्यास सुरुवात झाली आहे. २५ टक्के अधिक मोबदला देण्याची तयारी दर्शवित थेट खरेदीने जमिनी घेण्याचा प्रयत्न प्रशासन करीत आहे. परंतु, अपेक्षित मोबदला मिळत नसल्याची शेतकऱ्यांची धारणा झाली असून, ‘अलाइन्मेंट’ बदलून घरे, विहिरी वाचविण्याची मागणी करीत अनेक गावांमधील भूधारकांनी जमिनी देण्यास विरोध दर्शविला आहे.

या गावांमध्ये विरोध
देवळाली, आडगाव, विंचूरगवळी, बेळगाव ढगा, वडनेर दुमाला, पिंपळगाव बहुला, विहितगाव, मुंगसरे, महादेवपूर, जलालपूर, गोवर्धन या गावांमध्ये मोजणीला अद्याप सुरुवात होऊ शकलेली नाही. मखमलाबाद येथे १२ गटांचे मोजणीचे काम अपूर्ण असून सारूळ आणि राजूर बहुल्यात भूमापनाचा ग्रामपंचायतीचा ठराव जिल्हा प्रशासनाला अद्याप प्राप्त होऊ शकलेला नाही. भूमी अभिलेख विभागाची यंत्रणा मोजणीसाठी सज्ज असून, महसूल विभागही लवकरात लवकर मोजणीची प्रक्रिया पूर्ण करून भूसंपादनाचे काम मार्गी लावण्यासाठी प्रयत्नशील आहे.

नऊ गावांमध्ये मोजणी पूर्ण
नाशिक, दिंडोरीसह इगतपुरी, त्र्यंबकेश्वर तालु्क्यातील गावांमधून हा रिंगरोड जाणार आहे. यासाठी काही गावांमधील शेतकऱ्यांनी प्रशासनाला पूर्ण सहकार्य केले आहे. ढकांबे, मानोरी, वरवंडी, माडसांगवी, पाथर्डी, पिपंळगाव खांब, पंचक, आंबे बहुला आणि गौळाणे येथील संभाव्य बाधित शेतकऱ्यांनी जमीन मोजणीकामी जिल्हा प्रशासनाला पूर्ण सहकार्य केले आहे. माडसांगवीतील सर्वाधिक ८७, पाथर्डी गावातील ३३, गौळाणेतील २३, ढकांबे येथील १९, तर पंचक येथील १६ गटांच्या मोजणीचे काम महसूल यंत्रणेने पूर्ण केले आहे. मातोरीमध्ये आज सोमवार (दि. १६) रोजी सकाळपासून मोजणीला सुरुवात होणार असल्याची माहिती जिल्हा प्रशासनाने दिली.