कोल्हापूर: ठेकेदाराचा पाठलाग करून मारहाण, ३००० रुपये घेतले काढून; ५० हजारांची मागितली खंडणी

कोल्हापूर: लक्ष्मी औद्योगिक वसाहतीसह परिसरातील उद्योग, व्यावसायिकांना कामगार पुरविणारा अविनाश सर्वजित कुशवाह (वय २६, रा. मूळ जहानगंज, उत्तरप्रदेश, सध्या रा. खोचगे मळा, हातकणंगले) या परप्रांतीय कामगार ठेकेदाराचा शाहूनगर रस्त्यावर मोटारसायकलीने पाठलाग करून, त्याला चाकूचा धाक दाखवून मारहाण करून त्याच्या खिशातील रोख १८०० रुपये आणि ऑनलाइन एक हजार रुपये ट्रान्स्फर करून दर महिन्याला ५० हजार रुपये खंडणी द्यावी लागेल; अन्यथा व्यवसाय करू देणार नाही, अशी धमकी दिल्याप्रकरणी सहाजणांविरुद्ध हातकणंगले पोलिस ठाण्यात गुन्हा दाखल झाला आहे. याबाबतची फिर्याद अविनाश कुशवाह याने पोलिसांत दिली आहे. ही घटना बुधवारी सायंकाळी साडेपाचच्या दरम्यान घडली.

याबाबत पोलिसांकडून मिळालेली माहिती अशी की, अविनाश सर्वजित कुशवाह या कामगार पुरविणाऱ्या ठेकेदाराचा शाहूनगर-हातकणंगले रस्त्यावर सौरभ हणमंत कोरवी (वय २२, रा. हातकणंगले), युवराज संजय बरगे (२४, रा. खोतवाडी), आर्यन राजेश पाटील (२६, रा. इंदिरा कॉलनी, कबनूर), संतोष रमेश शिंगाडे (२४) आणि गणेश राजू लोखंडे (१९, दोघे रा. बिरदेव मंदिरजवळ, हातकणंगले); तसेच एका अनोळखी व्यक्तीने पाठलाग करून त्यांची गाडी अडवली.

त्यानंतर युवराज बरगे याने फिर्यादीला पकडून ठेवले, तर सौरभ कोरवी याने चाकूचा धाक दाखवून फिर्यादीच्या शर्टच्या खिशातील १,८०० रुपये काढून घेतले. त्यानंतर आर्यन पाटील याने फिर्यादीला मोटारसायकलीवरून खाली ओढून पाडले. इतर आरोपींनी फिर्यादीला लाथाबुक्क्यांनी मारहाण केली.

या सहा संशयितांनी अविनाश कुशवाह याला हातकणंगले परिसरामध्ये व्यवसाय करायचा असेल, तर दर महिन्याला ५० हजार रुपये खंडणी द्यावी लागेल, अन्यथा व्यवसाय करू देणार नाही, अशी जिवे मारण्याची धमकी दिली. संशयित आरोपींनी स्कॅनरद्वारे ऑनलाइन एक हजार रुपये ट्रान्स्फर करून घेतल्याचे फिर्यादीने तक्रारीत स्पष्ट केले आहे.

गुन्ह्यात वापरलेल्या मोटारसायकल आणि नंबर नसलेली मोपेड हातकणंगले पोलिसांनी जप्त केली आहे. सहा संशयितांविरुद्ध हातकणंगले पोलिस ठाण्यात खंडणीचा गुन्हा दाखल झाला आहे. या गुन्ह्याचा तपास पोलिस उपनिरीक्षक नानासाहेब पवार करत आहेत.