उत्तर प्रदेश: 'रोजचा त्रास सहन होईना!'; २३ वर्षीय सुनेने ब्लेडने कापला सासऱ्याचा प्रायव्हेट पार्ट; छेडछाडीला कंटाळून उचलले टोकाचे पाऊल

उत्तर प्रदेश: मुजफ्फरनगर जिल्ह्यातून एक अतिशय धक्कादायक घटना समोर आली आहे. आपल्यावर होणाऱ्या सततच्या छेडछाडीला कंटाळून एका २३ वर्षीय विवाहित महिलेने आपल्या ६७ वर्षीय सासऱ्याच्या प्रायव्हेट पार्टवर ब्लेडने जीवघेणा हल्ला केला. या घटनेमुळे संपूर्ण परिसरात प्रचंड खळबळ उडाली आहे. सासरा सध्या रुग्णालयात असून, पोलिसांनी सुनेला ताब्यात घेतले आहे.

नेमकी घटना काय?
ही घटना बुढाना पोलीस ठाण्याच्या हद्दीत घडली. आरोपी महिला आपल्या दोन लहान मुलांसह सासरी राहत होती, तर तिचा पती उदरनिर्वाहासाठी हरियाणात कामाला होता. पीडित सुनेचा आरोप आहे की, तिचा सासरा 'झाकीर' हा गेल्या अनेक दिवसांपासून तिच्यावर वाईट नजर ठेवून होता. पती घराबाहेर असल्याने या संधीचा फायदा घेत सासरा सतत तिचा पाठलाग करून छेडछाड करत होता आणि शारीरिक शोषण करण्याचा प्रयत्न करत होता.

शुक्रवारी सायंकाळच्या सुमारास सासऱ्याने पुन्हा एकदा असाच प्रकार करण्याचा प्रयत्न केला. या त्रासाला कंटाळून आणि स्वतःच्या सन्मानाचे रक्षण करण्यासाठी, महिलेने घरात उपलब्ध असलेल्या नेल कटरमधील छोट्या ब्लेडचा वापर करून सासऱ्याच्या गुप्तभागावर वार केला. या हल्ल्यात सासरा गंभीर जखमी झाला असून त्याला तातडीने बुढाना येथील सामूहिक आरोग्य केंद्रात आणि नंतर पुढील उपचारांसाठी जिल्हा रुग्णालयात हलवण्यात आले आहे.

शेजाऱ्यांचा धक्कादायक खुलासा:
या घटनेनंतर परिसरातील शेजाऱ्यांनी धक्कादायक माहिती दिली आहे. नाजरा नावाच्या एका शेजारी महिलेने सांगितले की, पीडित सून आधीही अनेकदा लोकांशी बोलताना म्हणायची की तिच्यासोबत घरात काहीतरी चुकीचे घडत आहे. तिने छेडछाडीची ही बाब अनेकांकडे मांडली होती, परंतु दुर्दैवाने कोणीही तिच्या बोलण्याकडे गांभीर्याने लक्ष दिले नाही. घराच्या आतील घडामोडी कोणालाच माहित नसल्याने, अखेर सुनेला स्वतःचा बचाव करण्यासाठी हे टोकाचे पाऊल उचलावे लागले.

पोलीस कायदेशीर कारवाई करत आहेत:
बुढानाचे पोलीस उपअधीक्षक गजेंद्र पाल सिंह यांनी दिलेल्या माहितीनुसार, पोलीस या संपूर्ण प्रकरणाचा तपास करत आहेत. प्राथमिक चौकशीत महिलेने सासऱ्यावर छेडछाडीचे गंभीर आरोप केले आहेत. अद्याप कुटुंबाकडून कोणतीही लेखी तक्रार प्राप्त झालेली नाही, परंतु लेखी तक्रार मिळताच संबंधित कलमांनुसार गुन्हा दाखल करून पुढील कायदेशीर प्रक्रिया पार पाडली जाईल. सध्या सासरा रुग्णालयात उपचार घेत आहे, तर पोलिसांनी सुनेला ताब्यात घेऊन तिची चौकशी सुरू ठेवली आहे.