पुणे: जिल्ह्यात मोबाईल ॲपद्वारे गर्भलिंग निदान; पोर्टेबल सोनोग्राफी मशिनचा 'असा' होतोय वापर!

पुणे: गर्भलिंग निदान करणाऱ्या गुन्हेगारांनी आता तंत्रज्ञानाचा वापर करून कायद्याला चकवा देण्याचे नवनवीन मार्ग शोधले आहेत. पुणे जिल्ह्यातील यवत येथे अशाच एका धक्कादायक प्रकाराचा पर्दाफाश झाला आहे, जिथे गर्भलिंग निदानासाठी पोर्टेबल सोनोग्राफी मशिनला 'वायफाय'द्वारे एका 'मोबाईल ॲप'शी जोडण्यात येत असल्याचे समोर आले आहे.

मार्च महिन्यात शिरूर तालुक्यातील डोकसांगवी येथे अशाच प्रकारची कारवाई करण्यात आली होती. त्यानंतर आता यवतमध्येही हा प्रकार उघडकीस आल्याने आरोग्य विभागात खळबळ उडाली आहे. या प्रक्रियेत, सोनोग्राफी मशिनच्या 'प्रोब'ला वायफायच्या साहाय्याने मोबाईल ॲपशी जोडले जाते आणि त्यानंतर मोबाईलवरूनच थेट सोनोग्राफी तपासणी केली जाते.

या प्रकाराची गंभीर दखल घेत दौंड तालुक्यातील सर्व सोनोग्राफी सेंटर्स, खासगी रुग्णालये आणि गर्भपात केंद्रांची (MTP Centers) तपासणी करण्याचे आदेश जिल्हा शल्यचिकित्सक डॉ. नागनाथ यम्पल्ले यांनी दिले आहेत. यासाठी पाच विशेष पथकांची नियुक्ती करण्यात आली असून, येत्या दोन दिवसांत अहवाल सादर करण्यास सांगण्यात आले आहे. या ॲपवर त्वरित बंदी घालण्याबाबत आरोग्य विभागाने राज्य सरकारला यापूर्वीच पत्र पाठवले आहे.

पुणे, अहिल्यानगर, धाराशिव, सातारा आणि सोलापूर या पाच जिल्ह्यांमध्ये अशा प्रकारच्या घटनांचे प्रमाण जास्त असल्याचे लक्षात आले आहे. त्यामुळे आता या जिल्ह्यांवर आरोग्य विभागाची विशेष नजर असून, माहिती मिळवण्यासाठी 'खबऱ्यां'चा वापर वाढवण्याच्या सूचना देण्यात आल्या आहेत.