कॉर्पोरेट नोकरीला रामराम! ९ वर्षांचा अनुभव असलेली आयटी मॅनेजर आता चालवतेय रिक्षा, महिना ६० हजार कमाई!

 

सध्याच्या धावपळीच्या युगात अनेकजण उच्च पगाराच्या नोकऱ्यांच्या मागे धावत असतात. मात्र, या सगळ्याला कंटाळून मानसिक शांततेसाठी एका महिलेने घेतलेला निर्णय सध्या सोशल मीडियावर चर्चेचा विषय ठरला आहे. दुबईस्थित उद्योजिका डॉ. नझरीन मिधलाज यांनी त्यांच्या नुकत्याच व्हायरल झालेल्या व्हिडिओमध्ये या महिलेची प्रेरणादायी यशोगाथा मांडली आहे.

नेमके काय घडले?

डॉ. नझरीन मिधलाज जेव्हा भारतात होत्या, तेव्हा त्यांची एका महिला ऑटो चालकाशी भेट झाली. त्या महिलेचे आत्मविश्वासाने भरलेले व्यक्तिमत्व आणि तिचा शांत स्वभाव पाहून नझरीन यांना कुतूहल वाटले. त्यांनी त्या महिलेशी संवाद साधला, तेव्हा समोर आलेल्या गोष्टी थक्क करणाऱ्या होत्या. ती महिला कोणतीही सामान्य रिक्षाचालक नसून, तिने तब्बल ९ वर्षे आयटी क्षेत्रात 'मॅनेजर' म्हणून काम केले होते.

नोकरी का सोडली?

आयटी क्षेत्रातील कामाचा ताण, ऑफिसमधील 'डेडलाईन्स' आणि सततचा मानसिक तणाव या गोष्टींना ती महिला कंटाळली होती. उच्च पद आणि पगारापेक्षा तिला स्वतःच्या मनाची शांती अधिक महत्त्वाची वाटली. कॉर्पोरेट जगातील राजकारण आणि तणाव सोडून तिने स्वतःच्या अटींवर जीवन जगण्याचा निर्णय घेतला आणि रिक्षा चालवण्यास सुरुवात केली.

कमाई आणि समाधान:

या करिअर बदलामुळे सुरुवातीला अनेकांना आश्चर्य वाटले, पण आता ती महिला खूप आनंदी आहे. तिने सांगितले की, सध्या ती रिक्षा चालवून दरमहा सुमारे ६०,००० रुपये कमावते. केवळ पैसाच नाही, तर आज ती पूर्वीपेक्षा अधिक तणावमुक्त आणि समाधानी जीवन जगत आहे.

या महिलेची ही कहाणी अनेकांसाठी प्रेरणादायी ठरत आहे. "यश म्हणजे फक्त मोठी पदवी किंवा मोठा पगार नसून, तुम्हाला जे करायला आवडते आणि ज्यात तुम्हाला शांतता मिळते, तेच खरे यश आहे," असा संदेश यातून मिळतो.