नाशिक: नीट पेपरफुटीचे केंद्र नाशिक; ओळख लपवण्यासाठी संशयिताने बदलली वेशभूषा, पोलिसांनी शिताफीने ठोकल्या बेड्या

नाशिक: देशभरातील लाखो विद्यार्थ्यांचे भवितव्य टांगणीला लावणाऱ्या नीट (NEET-UG 2026) परीक्षा पेपरफुटी प्रकरणात नाशिक पोलिसांनी मोठी कारवाई केली आहे. राजस्थान पोलिसांकडून मिळालेल्या माहितीच्या आधारे, नाशिक गुन्हे शाखेच्या युनिट २ ने ३० वर्षीय संशयित शुभम खैरनार याला इंदिरानगर भागातून ताब्यात घेतले आहे.

असा उघड झाला बनाव: ओळख लपवण्याचा प्रयत्न: अटकेच्या भीतीने संशयित शुभमने आपली ओळख लपवण्यासाठी पूर्ण वेशभूषा बदलली होती. त्याने आपले केस कापून टक्कल केले होते, जेणेकरून कोणालाही तो ओळखता येऊ नये. मंदिरात जाताना अटक: पोलिसांनी तांत्रिक तपासाच्या आधारे त्याचा माग काढला.

तो मंदिरात दर्शनासाठी जात असतानाच पोलिसांनी त्याला अत्यंत नाट्यमयरीत्या बेड्या ठोकल्या. तपासातील धक्कादायक माहिती: मूळचा नांदगावचा रहिवासी: शुभम खैरनार हा मूळचा नाशिक जिल्ह्यातील नांदगावचा रहिवासी असून तो भोपाळ येथे वैद्यकीय (MBBS) शिक्षण घेत असल्याची माहिती समोर येत आहे.

तो नाशिकमध्ये शैक्षणिक समुपदेशक (Educational Consultant) म्हणूनही कार्यरत होता. नाशिक ते हरियाणा कनेक्शन: तपासात असे समोर आले आहे की, नीट परीक्षेचा पहिला पेपर नाशिकमध्येच फुटला. येथून ही प्रश्नपत्रिका हरियाणात पाठवण्यात आली,
जिथे तिचे १० संच तयार करून इतर राज्यांमध्ये समाजमाध्यमांद्वारे पसरवण्यात आले. पुढील कारवाई:या प्रकरणी सीबीआय (CBI) आणि राजस्थान पोलिसांचे विशेष पथक अधिक तपास करत असून, संशयिताला राजस्थान पोलिसांच्या स्वाधीन केले जाणार आहे. या रॅकेटमध्ये अजून कोणाचे हात गुंतले आहेत,
याचा शोध सध्या पोलीस घेत आहेत.