Pune : आंदेकर टोळीचा खेळ खल्लास! दबदबा असलेल्या पेठेत पोलिसांची धडाकेबाज धिंड; शेवटी काय घडलं?

Pune : पुणे शहर आणि परिसरात गेल्या काही दिवसांत गँगवॉरच्या मालिकाच सुरू असल्याचे चित्र दिसत आहे. माजी नगरसेवक वनराज आंदेकर यांच्या हत्येनंतर या प्रकरणाचा बदला घेण्यासाठी आंदेकर टोळीने आक्रमक भूमिका घेतली. गेल्या तीन महिन्यांत या टोळीने दोन खून केल्याची नोंद पोलिसांकडे आहे. यात आयुष कोमकर आणि गणेश काळे या दोघांचा समावेश आहे. विशेष म्हणजे आयुष कोमकर हा आंदेकर गटाचा प्रमुख बंडू आंदेकर याचा नातू असूनही अंतर्गत मतभेदातून त्याची निर्दयी हत्या करण्यात आली होती.

वनराज आंदेकर खून प्रकरणातील संशयित समीर काळेच्या भावाचीही काही दिवसांपूर्वी गोळ्या झाडून हत्या करण्यात आली. सलग घडणाऱ्या या घटनांमुळे आंदेकर गटाने पुणे शहरात आणि ग्रामीण भागात दहशतीचं वातावरण निर्माण केल्याची चर्चा सुरू होती. या पार्श्वभूमीवर पुणे पोलिसांनी मोठी कारवाई करत आंदेकर टोळीचा कणा असलेल्या बंडू आंदेकरच्या तिन्ही मुलांना सार्वजनिकपणे उघड्यावर आणत धडक मोहीम राबवली.

Mumbai : मेट्रो नेटवर्कचा विस्तार वेगात; वडाळा ते गेटवे जोडणारी मेट्रो-11 मार्गिका चर्चेत! जाणून घ्या संपूर्ण प्रस्तावित रूट map

कृष्णा आंदेकर जो आयुष कोमकर हत्येचा मुख्य सूत्रधार मानला जातो त्याच्यासह अभिषेक आंदेकर आणि शिवराज आंदेकर या तिन्ही भावांची पोलिसांनी धिंड काढली. आंदेकर टोळीची सर्वाधिक दहशत असलेल्या गणेश पेठ आणि नाना पेठ परिसरात ही मोहीम राबवण्यात आली. घरझडतीच्या कारवाईदरम्यान पोलिसांनी आरोपींना या परिसरात नेले आणि तेथेच त्यांची धिंड काढून स्थानिकांमध्ये निर्माण झालेला गटाचा दरारा कमी करण्याचा प्रयत्न केला.

दरम्यान, पुणे पोलिसांनी अलीकडच्या काळात गुन्हेगारीविरोधात मोहीम अधिक तीव्र केली आहे. शहरातील विविध ठिकाणी केलेल्या छापेमारीत गेल्या तीन आठवड्यांत ११ देशी-विदेशी बनावटीच्या बंदुका आणि जिवंत काडतुसे जप्त करण्यात आली आहेत. वाढत्या गुन्ह्यांना आळा बसावा यासाठी पोलिसांकडून कठोर पावले उचलली जात असल्याचे अधिकाऱ्यांचे म्हणणे आहे