राष्ट्रपती जो बायडेन यांचा पंतप्रधान मोदींना ‘सॅल्यूट’; मोदींनीही दिला प्रतिसाद

१७व्या जी२० परिषदेसाठी पंतप्रधान नरेंद्र मोदी यांच्यासह G20 गटातील सर्व राष्ट्रांचे प्रमुख बालीमध्ये उपस्थित आहेत. आज G20 गटातील राष्ट्रप्रमुखांनी बालीमधील खारफुटीच्या जंगलाला भेट दिली. यावेळी अमेरिकेचे अध्यक्ष जो बायडेन यांनी पंतप्रधान मोदी यांना ‘सॅल्यूट’ केल्याचे छायाचित्र सध्या सोशल मीडियावर व्हायरल होत आहे. तसेच जो बायडेन यांनी ‘सॅल्यूट’ केल्यानंतर मोदींनीही त्यांना प्रतिसाद दिल्याचे दिसून येत आहे.

हवामान बदल आणि जागतिक तापमान वाढीविरोधात लढण्यासाठी आम्ही एकत्र आहोत, हा संदेश देण्यासाठी आज G20 गटातील सर्व राष्ट्रांचे प्रमुखांनी बालीमधील खारफुटीच्या जंगलाला भेट देत याठिकाणी वृक्षारोपण केले.

दरम्यान, काल पंतप्रधान मोदी आणि जो बायडेन यांच्या भेटीचा एक व्हिडिओही व्हायरल झाला होता. G20 परिषद सुरू होण्यापूर्वी परिषदेच्या ठिकाणी बायडेन दाखल होताच आपल्या जागेवर जाण्यापूर्वी ते थेट मोदींच्या दिशेने गेल्याचे दिसून आले होते. यावेळी दोन्ही नेत्यांनी हस्तांदोलन करून एकमेकांची गळाभेटही घेतली होती. त्यानंतर बायडेन पुन्हा वळून मोदींकडे आले आणि त्यांनी मोदींच्या खांद्यावर हात ठेवून त्यांच्याशी बोलायला सुरुवात केली. यावेळी मोदींनीही त्यांना काहीतरी सांगितल्यानंतर दोन्ही नेत्यांनी त्यावर दिलखुलास हसत एकमेकांना दाद दिली होती.

मागील काही महिन्यांमध्ये आंतरराष्ट्रीय पातळीवर घडलेल्या अनेक घडामोडींमुळे यंदा होणारी G20 परिषद महत्त्वाची असल्याचं बोललं जात आहे.