‘पीएफआय’च्या कार्यकर्त्यांवर गुन्हे; संघटनेवर बंदीबाबतचा निर्णय केंद्राकडे : फडणवीस

पॉप्युलर फ्रंट ऑफ इंडिया संघटनेच्या कार्यकर्त्यांना केंद्रीय आणि राज्यातील तपास यंत्रणेने गुरुवारी ताब्यात घेतले. त्याच्या निषेधार्थ पुण्यात शुक्रवारी ‘पीएफआय’ संघटनेच्या समर्थकांनी आंदोलन केले होते. त्या वेळच्या प्रसारित झालेल्या चित्रफितीमध्ये आंदोलक विविध घोषणा देताना दिसत आहेत. ‘पॉप्युलर फ्रंट ऑफ इंडिया जिंदाबाद’, ‘अल्लाहू अकबर’ अशा घोषणा दिल्या जात होत्या. दरम्यान, या आंदोलनाच्या वेळी ‘पाकिस्तान जिंदाबाद’ अशा घोषणा दिल्याचा दावा करीत चित्रफीत प्रसारित झाली होती. त्याचबरोबर ‘एनआयए’च्या कारवाईच्या निषेधार्थ पॉप्युलर फ्रंट ऑफ इंडियाच्या पदाधिकाऱ्यांनी शुक्रवारी जिल्हाधिकारी कार्यालयावर मोर्चा काढून घोषणाबाजी केली. मात्र, या आंदोलनास पोलिसांनी परवानगी नाकारली होती. परवानगी नाकारल्यानंतर पदाधिकाऱ्यांनी बेकायदा आंदोलन करून घोषणाबाजी केली. बेकायदा आंदोलन करून घोषणाबाजी केल्याप्रकरणी ४१ जणांना ताब्यात घेऊन त्यांच्याविरोधात गुन्हा दाखल करण्यात आला होता.

चित्रफितीची न्यायवैद्यक तपासणी

‘पीएफआय’च्या आंदोलनप्रकरणी गुन्ह्यांच्या कलमांमध्ये रविवारी वाढ करण्यात आली. आंदोलनानंतर ‘पाकिस्तान जिंदाबाद’च्या घोषणा देणारी एक चित्रफीत प्रसारित झाली होती. त्याची सत्यता आता न्यायवैद्यक प्रयोगशाळेकडून तपासण्यात येणार असल्याची माहिती पुणे पोलिसांनी दिली.

परवानगी नसताना आंदोलकांनी जमाव जमवून आंदोलन केले होते. या प्रकरणात आता भादंवि कलम १५३ ए, १५३ ब, १०९, १२० ब, अशा विविध कलमांची वाढ केली असून, पुढील तपास सुरू आहे.

– प्रताप मानकर, वरिष्ठ निरीक्षक, बंडगार्डन पोलीस ठाणे.

देशविरोधी घोषणा खपवून घेतल्या जाणार नाहीत. काही वर्षे सातत्याने तपास करून, पुरावे जमा करून ‘पीएफआय’वर कारवाई करण्यात आली आहे. यापूर्वीही राज्यात गृहमंत्री असताना त्यांच्या कृतीवर लक्ष ठेवून होतो.