पुणे : बेकायदा पिस्तुल विक्री प्रकरणात गुंडाला पकडले ; दांडेकर पूल परिसरात पोलिसांची कारवाई

पुणे : बेकायदा देशी बनावटीचे पिस्तुल विक्री प्रकरणात गुंडाला दत्तवाडी पोलिसांनी दांडेकर पूल परिसरात पकडले. त्याच्याकडून पिस्तुल घेणाऱ्या दोघांना अटक करण्यात आली आहे.

सूर्यकांत उर्फ पंडित दशरथ कांबळे (वय २६, रा. ताडीवाला रस्ता, खड्डा झोपडपट्टी आणि आंबेडकर झोपडपट्टी, दत्तवाडी) असे अटक करण्यात आलेल्याचे नाव आहे. कांबळे याच्या विरोधात खून, खुनाचा प्रयत्न, बेकायदा शस्त्र बाळगणे असे गंभीर स्वरुपाचे गुन्हे दाखल आहेत. त्याने रफीक उर्फ बबलू नबीलाल शेख (वय ३१, रा. दत्तवाडी), प्रमोद उर्फ कमलेश कैलास घारे (वय ३१, रा. दांडेकर पूल) यांना देशी बनावटीचे पिस्तुल विकले होते. या प्रकरणात शेख आणि घारे यांना अटक करण्यात आली होती. दोघांकडून देशी बनावटीचे पिस्तुल आणि दोन काडतुसे जप्त करण्यात आली होती.

चौकशीत कांबळेने पिस्तुलाची विक्री केल्याची माहिती तपासात मिळाली. कांबळेच्या विरोधात गुन्हा दाखल करण्यात आल्यानंतर तो पसार झाला होता. तो दांडेकर पूल परिसरातील मांगीरबाबा चौकात थांबल्याची माहिती तपास पथकातील पोलीस हवालदार कुंदन शिंदे आणि प्रशांत शिंदे यांना मिळाली. त्यानंतर पोलिसांनी सापळा लावून त्याला पकडले. कांबळेने पिस्तुल कोठून आणले तसेच आणखी काही गंभीर गुन्हे केले का?, यादृष्टीने तपास करण्यात येत आहे. वरिष्ठ पोलीस निरीक्षक अभय महाजन, गुन्हे शाखेचे पोलीस निरीक्षक विजय खोमणे यांच्या मार्गदर्शनाखाली उपनिरीक्षक चंद्रकांत कामठे, कुंदन शिंदे, प्रशांत शिंदे, चंद्रकांत मरगजे, अनिल सुर्वे, प्रमोद भोसले, पुरुषोत्तम गुन्ला आदींनी ही कारवाई केली.