व्हिसाची मुदत संपूनही भारतात बेकायदेशीरपणे वास्तव्य; पुणे परिसरात एका अफगाण विद्यार्थ्यावर कठोर कारवाई

पुणे आणि पिंपरी-चिंचवड परिसरात परदेशी नागरिकांच्या अवैध व अनधिकृत वास्तव्य विरोधात पोलिसांनी मोठी मोहीम हाती घेतली आहे. यादरम्यान, व्हिसा आणि रहिवासी परवानगीची (Residential Permit) मुदत संपली असतानाही भारतात बेकायदेशीरपणे वास्तव्य करणाऱ्या एका २६ वर्षीय अफगाण विद्यार्थ्यावर पोलिसांनी कठोर कायदेशीर कारवाई केली आहे. डन्यार हुसेन (Danyar Hussain) असे या कारवाईत अडकलेल्या अफगाण विद्यार्थ्याचे नाव असून तो पुण्यात एम.बी.ए. (MBA) चे शिक्षण घेत होता.

मिळालेल्या सविस्तर माहितीनुसार, हा विद्यार्थी शिवाजीनगर येथील एका कॉलेजमध्ये शिक्षणासाठी दाखल झाला होता आणि तो बावधान परिसरातील एका गृहनिर्माण सोसायटीमधील फ्लॅटमध्ये राहत होता. पिंपरी-चिंचवड पोलीस आयुक्तालय अंतर्गत येणाऱ्या हद्दीत बेकायदेशीरपणे वास्तव्य करणाऱ्या परदेशी नागरिकांचा शोध घेण्यासाठी विशेष मोहीम राबवली जात आहे. याच मोहिमेदरम्यान पिंपरी-चिंचवड पोलिसांच्या गुन्हे शाखा, परदेशी नागरिक नोंदणी कार्यालय (FRO) आणि दहशतवाद विरोधी पथकाने (ATB) संयुक्तपणे ही धडक कारवाई केली.

पोलिसांनी केलेल्या कागदपत्रांच्या पडताळणीमध्ये असे निष्पन्न झाले की, या विद्यार्थ्याचा अफगाण पासपोर्ट जरी वैध असला आणि त्याचा विद्यार्थी व्हिसा असला, तरी त्याच्याकडील अधिकृत रहिवासी परवानगीची (Residential Permit) मुदत संपली होती. मुदत संपल्यानंतरही त्याने विहित मुदतीत कागदपत्रे वाढवून घेतली नव्हती किंवा कोणतीही अधिकृत वाढीव परवानगी मिळवली नव्हती. त्यामुळे इमिग्रेशन नियमांचे उल्लंघन करून तो भारतात विनापरवाना अनधिकृतपणे वास्तव्य करत असल्याचे स्पष्ट झाले.

या प्रकरqणानंतर पोलिसांनी संबंधित विद्यार्थ्याला ताब्यात घेतले असून, त्याला त्याच्या देशात परत पाठवण्यासाठी (Deportation) कायदेशीर प्रक्रिया सुरू केली आहे. तसेच, परदेशी नागरिकांना आपल्या फ्लॅट किंवा खोलीत भाड्याने जागा देताना २४ तासांच्या आत ‘सी-फॉर्म’ (C-Form) द्वारे पोलिसांना माहिती देणे बंधनकारक असून, नियमांचे उल्लंघन करणाऱ्या मालमत्ता धारकांवरही कडक कायदेशीर कारवाई केली जाईल, असा इशारा प्रशासनाकडून देण्यात आला आहे.