पुणे: रोहित पवारांच्या आंदोलनाला मोठा धक्का; अलका टॉकीज चौकातील आंदोलनास पोलिसांचा नकार, दिले पर्यायी ठिकाणांचे प्रस्ताव!

पुणे: एमपीएसी (MPSC) अध्यक्षांच्या राजीनाम्याच्या मागणीसाठी राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी आगामी रविवार (दि. २७) रोजी पुण्यातील ऐतिहासिक आणि गजबजलेल्या अलका टॉकीज चौकात उपोषण व आंदोलन करण्याचे ठरवले होते. या आंदोलनासाठी त्यांनी पुणे पोलिसांकडे औपचारिक परवानगी मागितली होती, मात्र पुणे पोलिसांनी सुरक्षेचा आणि कायदा-सुव्यवस्थेचा प्रश्न समोर करत ही परवानगी स्पष्टपणे नाकारली आहे.

अलका टॉकीज चौक हा पुण्यातील अत्यंत महत्त्वाचा, मध्यवर्ती आणि संवेदनशील वाहतूक टप्पा आहे. गणेश विसर्जन मिरवणुकीचा मोठा काळ नुकताच संपला असला, तरी त्यानंतरही त्या परिसरातील कायदा व सुव्यवस्था, तसेच सार्वजनिक शांतता अबाधित राखणे पोलिसांसाठी अत्यंत महत्त्वाचे असते. याच कारणास्तव सुरक्षेच्या दृष्टीने तिथे आंदोलन करण्यास परवानगी देणे शक्य नसल्याचे स्पष्टीकरण पुणे शहर पोलिस आयुक्त अमितेश कुमार यांनी दिले आहे. अलका टॉकीज चौकात मोठ्या प्रमाणावर नागरिकांची आणि वाहनांची रहदारी असल्‍यामुळे गर्दी होऊ शकते आणि त्यामुळे शहरातील वाहतूक व्यवस्था विस्कळीत होण्याची शक्यता लक्षात घेऊन प्रशासनाने हा निर्णय घेतला आहे.

शांतता व सुव्यवस्था अबाधित ठेवण्यासाठी पोलिसांकडे असलेल्या कायदेशीर अधिकारांनुसार ही योग्य ती कार्यवाही करण्यात आल्याचे पोलिस आयुक्तांनी स्पष्ट केले आहे. एमपीएससी विद्यार्थ्यांच्या विविध मागण्या आणि अध्यक्षांच्या राजीनाम्यासाठी आमदार रोहित पवार यांनी विद्यार्थ्यांसोबत मिळून या आंदोलनाची घोषणा केली होती. सुरुवातीला त्यांनी २६ सप्टेंबर रोजी आंदोलन करण्याचे जाहीर केले होते. मात्र, २६ तारखेला गणेश विसर्जन मिरवणुकीचा मोठा बंदोबस्त आणि पोलिस यंत्रणा व्यस्त असल्यामुळे, त्यांनी आंदोलनाची तारीख बदलून २७ सप्टेंबर रोजी करण्याचे ठरवले आणि त्यानुसार पोलिसांकडे पुन्हा अर्ज दाखल केला होता.

पोलिस प्रशासनाने अलका टॉकीज चौकातील आंदोलनाची मागणी फेटाळली असली, तरी लोकशाही मार्गाने आंदोलन करण्याच्या अधिकाराचा सन्मान राखत प्रशासनाकडून आंदोलकांसाठी काही पर्यायी ठिकाणे सुचवण्यात आली आहेत. यामध्ये विभागीय आयुक्त कार्यालय परिसर किंवा पुणे रेल्वे स्टेशन समोरील डॉ. बाबासाहेब आंबेडकर पुतळा परिसर यांसारख्या अधिकृत व मोकळ्या पर्यायी ठिकाणांचा प्रस्ताव पोलिसांनी आंदोलकांना दिला आहे. आता आमदार रोहित पवार आणि आंदोलक विद्यार्थी या पर्यायी ठिकाणांबाबत काय निर्णय घेतात, याकडे सर्वांचे लक्ष लागले आहे.