पुणे पोलीस भरती बनावट प्रमाणपत्र घोटाळा! कोल्हापुरातील पुनगावकर दाम्पत्याला अटक, राज्यभरात रॅकेट पसरल्याचा संशय

पुणे/कोल्हापूर: पुणे शहर पोलीस दलाच्या शिपाई भरती प्रक्रियेत 'कुराश' या क्रीडा प्रकाराची बनावट प्रमाणपत्रे सादर करून खेळाडू आरक्षणाचा गैरफायदा घेतल्याप्रकरणी पुणे पोलिसांच्या गुन्हे शाखेने मोठी कारवाई केली आहे. या प्रकरणात कोल्हापूर येथील एका क्रीडा अकॅडमी चालवणाऱ्या दाम्पत्याला अटक करण्यात आली आहे. श्रुती पुनगावकर (वय ४५) आणि धैर्यशील पुनगावकर (वय ५१, दोघे रा. कोल्हापूर) अशी अटक केलेल्यांची नावे आहेत.

अशी उघड झाली मोडस ऑपरेन्डी: या प्रकरणातील मुख्य आरोपी आणि महाराष्ट्र राज्य कुराश असोसिएशनचा सचिव शिवाजी साळुंखे याचे पुनगावकर दाम्पत्य नातेवाईक आहेत. कोल्हापुरातील त्यांच्या अकॅडमीमध्येच कुराश खेळाची बनावट कागदपत्रे आणि प्रमाणपत्रे तयार केली जात होती. साळुंखे याला अटक झाल्यानंतर या दाम्पत्याने पुरावे नष्ट करण्याचाही प्रयत्न केला होता. आरोपींनी प्रत्यक्षात स्पर्धांमध्ये भाग न घेतलेल्या उमेदवारांना पैसे घेऊन ५ टक्के क्रीडा आरक्षणासाठी प्रमाणपत्रे विकल्याचे तपासात निष्पन्न झाले आहे.

१९ उमेदवारांनी मिळवली होती नोकरी: पुणे पोलीस भरतीत या बनावट प्रमाणपत्रांच्या आधारे तब्बल १९ उमेदवारांची निवड झाली होती. त्यापैकी १० उमेदवार प्रशिक्षणासाठी गेले असून, ९ जणांचे प्रशिक्षण सुरू होणे बाकी होते. कुराश संघटनेच्या पदाधिकाऱ्यांनी गेल्या ११ वर्षांत राज्यभरात १,००० पेक्षा जास्त बनावट प्रमाणपत्रे वाटल्याचा प्राथमिक अंदाज असून, इतर शासकीय भरतींमध्येही याचा वापर झाला आहे का, याचा तपास गुन्हे शाखा करत आहे.