T20 WC 2026, PAK vs NAM : पाकिस्तानने नामिबियाला 102 धावांनी केलं पराभूत, सुपर 8 फेरीत एन्ट्री

टी20 वर्ल्डकप 2026 स्पर्धेत भारताकडून पाकिस्तानचा दारूण पराभव झाला होता. त्यामुळे सुपर 8 फेरीचं गणित नामिबियाविरुद्धच्या सामन्यावर अवलंबून होतं. या सामन्यात विजय मिळाला तर सुपर 8 फेरीत जागा मिळणार होती. अखेर पाकिस्तानने नामिबियाला पराभूत केलं आणि सुपर 8 फेरीत जागा पक्की केली. यामुळे अमेरिकेच्या उरल्यासुरल्या ज्या काही आशा होत्या. त्या संपुष्टात आल्या आहेत. या सामन्यात पाकिस्तानने प्लेइंग 11 मध्ये काही बदल केले होते. शाहीन शाह आफ्रिदीला प्लेइंग 11 मधून वगळलं. तसेच फलंदाजीत बाबर आझमला मैदानात उतरवलंच नाही. पाकिस्तानने या दोघांना काहीही वगळण्याचा निर्णय घेतल्याचं यातून दिसून आलं. पाकिस्तानने नाणेफेकीचा कौल जिंकला आणि प्रथम फलंदाजी स्वीकारली. या सामन्यात पाकिस्तानने 20 षटकात 3 गडी गमवून 199 धावा केल्या आणि विजयासाठी 200 धावांचं आव्हान दिलं. या सामन्यात साहिबजादा फरहानची शतकी खेळी महत्त्वाची ठरली. हा सामना पाकिस्तानने 102 धावांच्या फरकाने जिंकला.

पाकिस्तानकडून साहिबजादा फरहान आणि सईम आयुब ही जोडी मैदानात आली होती. या जोडीने पहिल्या विकेटसाठी 40 धावांची भागीदारी केली. पावरप्लेचं शेवटचं षटकं सुरू असताना पहिल्या चेंडूवर सईम आयुबची विकेट मिळाली. त्यानंतर साहिबजादा फरहानने कर्णधार सलमान आगासोबत मोर्चा सांभाळला. दुसऱ्या विकेटसाठी 42 चेंडूत 67 धावांची खेळी केली. ही जोडी फुटल्यानंतर ख्वाजा नाफाय मैदानात उतरला. पण तो काही खास करू शकला नाही. फक्त 5 धावा करून तंबूत परतला. त्याला बाबर आझमच्या पुढे प्रमोशन देण्यात आलं होतं. पण बाद झाल्यानंतरही बाबर ऐवजी शादाब खानला पुढे पाठवल. शाहिबजादा फरहान आणि शादाब खान यांनी चौथ्या विकेटसाठी नाबाद 81 धावांची खेळी केली.

पाकिस्ताननी विजयासाठी दिलेल्या धावांचा पाठलाग करताना नामिबियाचा डाव पत्त्यासारखा कोसळला. एकही फलंदाजी साजेशी कामगिरी करू शकला नाही. एका पाठोपाठ एक धडाधड विकेट पडत गेल्या. लॉरेन स्टीनकॅम्प 23, जॅन फ्रायलिंक 9, जॅन निकोल लॉफ्टी-ईटन 5, गेरहार्ड इरास्मस 7, अलेक्झांडर वोल्शेंक 20, जेजे स्मित 9, रुबेन ट्रम्पेलमन 0, झेन ग्रीन 7 , विलेम मायबर्ग 8, बर्नार्ड शॉल्झ 1,  असे बाद झाले. जॅक ब्रासेल नाबाद 1 धावेवर राहिला.