धावत्या ट्रेनमध्ये गुंजली किंकाळी! पुणे-सुपौल एक्सप्रेसमध्ये महिलेची सुखरूप प्रसूती

पुणे: पुणे रेल्वे स्थानकावरून सुटलेल्या पुणे-सुपौल एक्सप्रेसमध्ये (१२५२८) एका महिलेने धावत्या ट्रेनमध्ये एका गोंडस बाळाला जन्म दिला आहे. ही सुखद घटना रेल्वे प्रवासादरम्यान घडली असून, रेल्वे कर्मचारी आणि सहप्रवाशांच्या प्रसंगावधानामुळे माय-लेक दोघेही सुरक्षित आहेत.

मिळालेल्या माहितीनुसार, संबंधित महिला आपल्या कुटुंबासह पुणे ते बिहार असा प्रवास करत होती. दरम्यान, गाडी उत्तर प्रदेशातील गोंडा रेल्वे स्थानकाजवळ पोहोचत असताना महिलेला तीव्र प्रसूती कळा सुरू झाल्या. रेल्वेतील सहकाऱ्यांनी तातडीने याची माहिती रेल्वे प्रशासनाला दिली.

घटनेचे गांभीर्य ओळखून रेल्वे सुरक्षा दल (RPF) आणि वैद्यकीय पथकाने तातडीने हालचाली केल्या. रेल्वे कर्मचाऱ्यांनी डब्यातच तात्पुरती व्यवस्था करून महिलेला मदत केली. काही वेळातच महिलेने एका बाळाला जन्म दिला. गाडी गोंडा स्थानकावर पोहोचताच रेल्वे डॉक्टरांनी प्राथमिक तपासणी केली आणि त्यानंतर पुढील उपचारांसाठी माता आणि बाळाला जिल्हा रुग्णालयात दाखल करण्यात आले. रेल्वे प्रशासनाने दाखवलेल्या या तत्परतेचे सर्वत्र कौतुक होत आहे.