पिंपरी-चिंचवड शहरात पाणी संकट गंभीर होणार! १६ ऑक्टोबरपासून आणखी दहा टक्के पाणी कपात लागू

पिंपरी-चिंचवड शहरात आधीच दिवसाआड आणि अपुरा पाणीपुरवठा होत असताना, आता नागरिकांच्या अडचणीत आणखी भर पडणार आहे. एल निनोच्या (El Nino) प्रभावामुळे पर्जन्यमानात घट झाल्याने आणि दुष्काळसदृश्य परिस्थिती निर्माण झाल्याने, वर्षभराचे जलनियोजन डोळ्यासमोर ठेवून १६ ऑक्टोबरपासून शहरात आणखी दहा टक्के पाणी कपात केली जाणार आहे. आधीच शहरात १०५ एमएलडी पाण्याची तूट असताना या नवीन पाणीकपातीमुळे नागरिकांसमोर पाण्याचे मोठे संकट उभे ठाकले आहे.

पिंपरी-चिंचवड शहराला प्रामुख्याने मावळातील पवना धरणातून ५४० एमएलडी, आंद्रा धरणातून ९५ एमएलडी आणि एमआयडीसीकडून ३० एमएलडी असा मिळून एकूण ६६५ एमएलडी पाणीपुरवठा केला जातो. विशेष म्हणजे, २५ नोव्हेंबर २०१९ पासून शहरात आधीच दिवसाआड पाणीपुरवठा योजना सुरू आहे. यंदा पावसाचे प्रमाण अनियमित राहिल्यामुळे आणि पाऊस लांबल्यामुळे जलसंपदा विभागाने सुरुवातीला १५ टक्के पाणी कपात केली होती. मात्र, जुलै महिन्यात समाधानकारक व जोरदार पाऊस झाल्यानं पवना आणि आंद्रा ही दोन्ही धरणे शंभर टक्के भरली होती. त्यावेळी ही कपात मागे घ्यावी, अशी मागणी महापालिकेच्या वतीने जलसंपदा विभागाकडे करण्यात आली होती. परंतु, जलसंपदा विभागाने ती कपात मागे घेतली नव्हती.

आता एल निनोच्या प्रभावामुळे आणि संभाव्य दुष्काळी परिस्थितीच्या पार्श्वभूमीवर जलसंपदा विभागाने आणखी १० टक्के पाणी कपात वाढविण्याचे आदेश स्थानिक स्वराज्य संस्थांना दिले आहेत.

वाकडमधील ३४ सोसायट्यांना ५० टक्केच पाणी: शहरात दैनंदिन वापरासाठी ७७० एमएलडी पाण्याची आवश्यकता आहे, मात्र प्रत्यक्षात केवळ ६६५ एमएलडी एवढाच पुरवठा होत आहे. म्हणजेच मागणीपेक्षा तब्बल १०५ एमएलडी पाण्याची तूट कायम आहे. या तुटीचा सर्वाधिक फटका वाकड परिसराला बसत आहे. वाकडमधील २०० ते ५०० सदनिका असलेल्या तब्बल ३४ मोठ्या गृहनिर्माण सोसायट्यांना महापालिकेकडून केवळ ५० टक्केच पाणीपुरवठा केला जात आहे. त्यामुळे या सोसायट्यांमधील रहिवाशांना पाण्यासाठी पूर्णपणे टँकरवर अवलंबून राहावे लागत असून, आम्हाला शंभर टक्के पाणीपुरवठा करण्यात यावा, अशी आग्रही मागणी सोसायटीधारकांकडून केली जात आहे.

जलसंपदा विभागाचे कार्यकारी अभियंता किरण देशमुख यांनी दिलेल्या माहितीनुसार, येत्या १६ ऑक्टोबरपासून १० टक्के पाणी कपात लागू करण्याबाबतचे राज्य सरकारचे आदेश प्राप्त झाले आहेत. त्यानुसार लवकरच महापालिकेला याबाबतचे अधिकृत पत्र पाठविण्यात येणार आहे. दुसरीकडे, पाणीपुरवठा विभागाचे सह शहर अभियंता अजय सूर्यवंशी यांनी सांगितले की, सध्या मागणीच्या तुलनेत आधीच कमी पाणी मिळत आहे आणि १६ ऑक्टोबरपासून धरणातून जेवढे पाणी उपलब्ध होईल, त्यानुसार पाण्याचे योग्य नियोजन केले जाईल. महापालिकेला पत्र मिळाल्यानंतर यावर अधिकृत अंतिम आराखडा तयार केला जाईल.