साताऱ्यात काळाचा घाला! संसाराचं साहित्य भरलेला ट्रक ५० फूट दरीत कोसळला; चिमुकल्यासह चौघांचा दुर्दैवी मृत्यू

सातारा: सातारा जिल्ह्यातील कासरतळे परिसरात शुक्रवारी रात्री एक अत्यंत भीषण आणि हृदयद्रावक अपघात घडला. नवीन ठिकाणी संसार थाटण्यासाठी निघालेल्या एका कुटुंबावर काळाने झडप घातली आहे. घराचे साहित्य आणि पाळीव प्राणी घेऊन जाणारा आयशर ट्रक अचानक ५० फूट खोल दरीत कोसळल्याने एका लहान मुलासह तीन महिलांचा जागीच मृत्यू झाला.

मिळालेल्या माहितीनुसार, संबंधित कुटुंबाचे पुनर्वसन झाले होते. आपल्या नव्या घराकडे जाण्यासाठी ते घरातील सर्व साहित्य, धान्य आणि पाळीव जनावरे ट्रकमध्ये भरत होते. ट्रक रस्त्याच्या कडेला उभा असताना अचानक तोल जाऊन थेट दरीत कोसळला. या भीषण अपघातात ट्रकमधील साहित्याखाली दबल्या गेल्यामुळे चार जणांना आपला प्राण गमवावा लागला. मानवी जीवितासोबतच काही पाळीव जनावरांचाही या अपघातात मृत्यू झाला आहे.

या घटनेची माहिती मिळताच स्थानिक ग्रामस्थांनी मदतीसाठी धाव घेतली. अपघातात दोन जण गंभीर जखमी झाले असून त्यांच्यावर सातारा जिल्हा रुग्णालयात उपचार सुरू आहेत. सातारा तालुका पोलिसांनी घटनास्थळी पोहोचून पंचनामा केला असून, या घटनेमुळे परिसरात मोठी हळहळ व्यक्त केली जात आहे.