काळजाचा थरकाप! अस्थी विसर्जन करायला जाताना पिकअपला डंपरची भीषण धडक, एकाच कुटुंबातील ८ जणांचा जागीच मृत्यू, ९ गंभीर

पंजाबमधील फाजिल्का येथे शनिवारी पहाटेच्या सुमारास एक अत्यंत हृदयद्रावक आणि भीषण अपघात घडल्याची घटना समोर आली आहे. एकाच कुटुंबातील सदस्य आपल्या नातेवाईकाच्या अस्थी विसर्जनासाठी पिकअप वाहनाने जात असताना, एका भरधाव डंपरने त्यांच्या वाहनाला जोरदार धडक दिली. या भीषण अपघातात एकाच कुटुंबातील ८ जणांचा जागीच मृत्यू झाला असून, अन्य ९ जण गंभीर जखमी झाले आहेत.

पहाटेच्या सुमारास घडली दुर्घटना हा थरारक अपघात फिरोजपूर महामार्गावर शनिवारी पहाटे साडेपाच वाजण्याच्या सुमारास घडला. अपघाताची तीव्रता इतकी भयानक होती की घटनास्थळी रक्तामांसाचा चिखल झाला होता आणि पिकअप वाहनाचा पूर्णपणे चक्काचूर झाला.

मृतांमध्ये महिला आणि बालकाचा समावेश मिळालेल्या प्राथमिक माहितीनुसार, अपघातातील सर्व मृत हे एकाच कुटुंबातील रहिवासी होते. मृत पावलेल्या ८ जणांमध्ये ५ महिला आणि एका १० वर्षांच्या निष्पाप मुलाचा समावेश आहे. या घटनेमुळे संपूर्ण परिसरात आणि नातेवाईकांवर दुःखाचा डोंगर कोसळला आहे.

जखमींची प्रकृती चिंताजनक अपघाताची माहिती मिळताच स्थानिक नागरिकांनी आणि पोलिसांनी तातडीने घटनास्थळी धाव घेतली. या अपघातात ९ जण गंभीररित्या जखमी झाले असून, त्यांना तातडीने उपचारासाठी फरिदकोट येथील रुग्णालयात दाखल करण्यात आले आहे. जखमींपैकी काहींची प्रकृती चिंताजनक असल्याची माहिती मिळत आहे. पोलीस सध्या या प्रकरणाचा अधिक तपास करत असून धडक देणाऱ्या डंपर चालकाचा शोध घेतला जात आहे.