छत्रपती संभाजीनगरात दुर्दैवी अंत! एशियन हॉस्पिटलमधील आगीच्या दुर्घटनेतून सुखरूप वाचवलेल्या जुळ्या बालकांचा घाटी रुग्णालयात उपचारादरम्यान मृत्यू

छत्रपती संभाजीनगर शहरातील आकाशवाणी चौकातील प्रसिद्ध एशियन सिटी केअर रुग्णालयाच्या 'एनआयसीयू'मध्ये (NICU) घडलेल्या आगीच्या भीषण दुर्घटनेतून सुखरूप बाहेर काढण्यात आलेल्या जुळ्या बालकांबाबत एक अत्यंत दुःखद बातमी समोर आली आहे. या आगीच्या दुर्घटनेनंतर शासकीय घाटी रुग्णालयात उपचारासाठी दाखल करण्यात आलेल्या त्या जुळ्या शिशूंपैकी दोन्ही बालकांचा उपचारादरम्यान मृत्यू झाला असून, या घटनेमुळे कन्नडच्या कुरेशी कुटुंबावर आणि संपूर्ण परिसरात शोककळा पसरली आहे.

काय होती नेमकी घटना? शहरातील एशियन हॉस्पिटलच्या अतिदक्षता विभागातील (NICU) वातानुकूलित यंत्रणेमध्ये (AC) अचानक तांत्रिक बिघाड झाल्यामुळे शुक्रवारी (ता. ४) पहाटेच्या सुमारास आग लागली होती. या कक्षात त्यावेळी नऊ नवजात बालकांवर उपचार सुरू होते. आगीमुळे निर्माण झालेला धूर संपूर्ण परिसरात पसरल्याने एकच धावपळ उडाली. रुग्णालयातील सतर्क कर्मचारी आणि डॉक्टरांनी जिवाची बाजी लावून तात्काळ सर्व नऊ बालकांना सुरक्षित बाहेर काढले. या आगीतून सुखरूप वाचवलेल्या बालकांपैकी जुळ्या बालकांना पुढील उपचारासाठी शासकीय घाटी रुग्णालयात (GMCH) दाखल करण्यात आले होते.

वेळेपूर्वी जन्म आणि प्रकृतीतील गुंतागुंत: साधारणपणे गर्भावस्थेचा कालावधी ३८ ते ४० आठवड्यांचा मानला जातो, परंतु या जुळ्या बालकांचा जन्म अवघ्या २७ आठवड्यांतच (प्रि-मॅच्योर) झाल्यामुळे त्यांचे वजन अत्यंत कमी होते. अशा अत्यंत नाजूक आणि बिकट परिस्थितीत त्यांना जीवनदान देण्यासाठी घाटी रुग्णालयातील डॉक्टरांनी दिवसरात्र शर्थीचे प्रयत्न केले. परंतु, प्रकृती अत्यंत खालावल्यामुळे रविवारी आणि सोमवारी उपचारादरम्यान दोन्ही बालकांची प्राणज्योत मालवली.

एशियन रुग्णालयाच्या आगीच्या दुर्घटनेतून देवदूतासारखे वाचलेले हे जुळे बाळ अखेर उपचारादरम्यान मृत्यूशी सुरू असलेली झुंज हारल्याने सर्वत्र हळहळ व्यक्त होत आहे. दरम्यान, बालकांच्या पालकांनी आणि कुटुंबीयांनी डॉक्टरांनी केलेल्या उपचारांबद्दल समाधान व्यक्त करत, डॉक्टरांनी त्यांना वाचवण्यासाठी पूर्ण प्रयत्न केल्याचे सांगितले आहे. या दुर्दैवी घटनेमुळे बालकांच्या कुटुंबावर दुहेरी आघात झाला आहे.